Mizoramah Covid-19 hripui leng a hluar zel avang te, nitina damlo kan pun zel avang leh thi pawh kan pun chhoh zel avangin Mizoram sawrkar hmalakna in veng leh khaw hrang hrangah te Covid-19 vei leh vei lo endik hna 'mass test' kalpui mek a ni a. Mipuiin an hlutin test pawh an tam a, positive hmuhchhuah pawh an tam a. Tun dinhmunah chuan positive te awmna/enkawlna chungchangah kan buai deuh niin a lang a, mahse hei hian nakin zela kan buaina nasa zawk thleng tur lakah nasa takin min chhawk dawn avangin sawrkar hian tawp san mai lovin kalpui zel se a duhawm hle.

Mass test hi kan ti har mah mah em aw? a tih theih a, mahse tun pawh hi a la tlai chhe chuang lo a ni. Kan ramah hian Covid-19 hian bu a khuar nghet tawh hle mai a, Aizawl mai ni lovin thingtlang khaw kilkhawr ber ber pawh hri hian a luhchilh tawh a ni. Tuna test neih mekah pawh hrikai mi engemaw zat hmuhchhuah a ni a, heng hrikai te hi hmuhchhuah ni ta lo sela chuan hrikai tih pawh inhre lovin midang nen an inawmpawlh dawn tihna a ni a. Mi engzatin nge kai belh ang tih pawh sawi-thiam har tak a ni.

Thil pawi deuh erawhchu hetia sawrkarin sum tam tak senga test a kalpui lai hian in test duh lo mi engemaw zat kan la awm niin a lang a, hei hi thil pawi tak a ni. Mahni dinhmun dik tak inhriat hi mi huaisen awmdan a ni a, mahni dinhmun pawh inhre ngam lo khawpa awm hi mi dawihzep hna a ni. Covid-19 hi kan lo positive anih pawhin natna chi khat a ni ve mai a, a hun taka enkawl anih chuan natna hlauhawm a ni lem lo. A natna hi hmuhchhuah har a, enkawl har anih chuan kan taksa a khawih pawi hman thin a, thihna hial a thlenphah thei a ni. Chuvangin tuna huntha a awm lai hian a tam thei ang berin chhawr tangkai kan tum tur a ni.

Mizoram hmun hrang hrangah mass test kalpui tan a ni a, positive pawh mi engemaw zat hmuh a ni ta reng a. Positive thar te awmna turah sawrkar pawh a buai deuh niin a lang. Covid-19 hian engtia rei nge min la chenchilh dawn hriat a ni lova, chuvangin sawrkar hian he natna kan do kawngah hian ruahmanna fel fai tak a duan a pawimawh hle. Covid-19 damlo enkawlna hmunpui Zoram Medical College ah chuan hrikai kan punbelh zel avangin khum indaihlohna a nasa hle a, hei bak hi a bika Covid-19 damlo enkawlna hmun kan neih loh avangin hrivei hi pung chho zel ta se engtia enkawl nge a tum tih te, hrikai zel tur tihhniam/control nan eng te nge pawimawh tih ngun taka a ngaihtuah a pawimawh hle.

Mass test hi neih chhunzawm zel ni se, mipui pawh a tam thei ang ber in test tir ngei ila. A bik takin mipui ten an pan rawn dawrkai, sumdawng leh pawnchhuak tam te chuan chhawr tangkai ngei se a duhawm hle. Chutih rual chuan mass test a kan negative avang hian kan ngaih a tha mai ang a, fimkhurna kan tlachham mai ang tih erawh a hlauhawm hle. Covid-19 laka kan himna tur thil chi hrang hrang te hi hrereng ila, thu kan awih phawt chuan hun reilote ah nunphung pangngai a kan let leh theih mai a beiseiawm e.