Aizawl: Mizoram Mathematics Society chuan nimin khan a vawi 9-na atan Pachhunga University College-ah pawl V, VIII, X & XII te tan Mizoram pum huap Mathematics inelna an buatsaih. Mathematics inelna hi centre paruk - Aizawl, Lunglei, Champhai, Serchhip, Mamit leh Saitual-ah te neih a ni a. Exam tura hming pe hi Aizawl centre-ah 2203, Lunglei-ah 694, Champhai-ah 284, Serchhip-ah 288, Mamit-ah 20 leh Saitual-ah 153 an vaiin 3642 an ni a, exam hi Mizo zirlaiten Mathematics an hlauhna tihbona a nih theih beiseiin kum 2007 atang khan neihtan a ni a. Kum tin zirlaite leh nu leh paten hlut telh telhin exam beitu pawh an pung chho zel a ni. Tun tuma exam chhanna te hi a vawikhatna atan Optical Mark Recognition (OMR) hmanga endik a ni dawn a ni.