Aizawl: Mizoram Mathematics Society (MMS) leh Mizoram Science, Technology & Innovation Council (MISTIC), Department of Science & Technology Mizoram tangkawpin Pachhunga University College-a an buatsaih ni 5 awh, Mathematics Summer Day Camp chu Zirtawpni khan khar a ni. Mathematics Summer Day Camp hi kum dangah pawh lo buatsaih tawh thin niin Mathematics subject a zirlaiten hma an sawn theih nana buatsaih a nih thu a buatsaihtute chuan an sawi a. He camp-ah hian pawl 9 leh pawl 11 pass chhuak chiahte tan an zir hmabak pawl 10 leh pawl 12 zirlaia Mathematics chu ni 5 chhung hian lo zir lawkpui an ni a. Kumin camp-ah hian pawl 9 pass chiah pawl 10 zirlai zir tur mi 60 leh pawl 11 pass chiah pawl 12 zirlai zir tur 38 an inziak lut niin a buatsaihtute chuan an sawi a. Hlawhtling takin an nei thei tih sawiin naupangten an hlawkpui hle niin a buatsaihtute chuan Zalen an hrilh. Mizoram Mathematics Society Assistant Secretary Lalrinpuia Tlau chuan an camp buatsaih chu zirlaiten an school chawlh laia Mathematics zirna kawnga hma an sawn theih nan leh state dangte el pha khawpa thiamna an neih theih nan a nih thu a sawi a. State dangah pawh camp chu an huaihawt ve thin thu a sawiin kumin hi an vawi 3 huaihawtna a nih thu a sawi bawk.