ZALEN April 23, 2026 : School Education Minister Dr. Vanlalthlana chuan Mizoram Board of School Education buatsaih, HSLC Examination 2026 result ruahman lawk anga tihchhuah a ni leh sawrkar hmingpu school te hmasawnna-ah lawmthu a sawi.

Education Minister chuan Zirlai exam hmachhawn mi 18,257 aṭanga za zela 80.31-in hlawhtlinna an chang thei leh nikum aia pass percentage a sang a, za-a 80 a kai thei chu lawmawm a ti a, kumin HSLC result chhuakah hmasawnna lawmawm tak Govt School-ah a lang tiin nikuma Govt School a pass za-a 68.01 chu kumin hian khumin za-a 72.07 an pass a ni, a ti.

Candidate zawng zawng an fail vekna school-ah RMSA School la nei nual mah se, Govt school hmingpu an lang tawh lo leh za-a-za an pass vekna school-ah kum dang aia Govt School an lang tam a, Govt School 21 an lang chu lawmawm a tih thu a sawi a. Result hian zirlaite tan Govt school a belhtlak tih a rawn tarlang a ni a ti.

Minister chuan kumina result tihchhuah dan chu puanzar tawh angin kum dang aia a danglam thu leh top ten leh Division te an lan tak loh thu te, MBSE website-ah erawh chuan zirlaiten an mark leh percentage an en theih thu leh board dang pawhin an kalpui dan a nih thu a sawi a, hei hian a tha zawnga nghawng a neih chhoh zel a beisei thu a sawi a ni.

Minister chuan Zirlai hlawhtlinna chang tharte a lawmpui thu leh an hma lam hunah hlawhtlinna an chan zel theih nan duhsakna a hlan thu a sawi a. Hlawhtlinna chang zo ta lo te pawh beidawng mai lova nasa zawka tan la tur leh result lawmawm nei thei ngei turin a chah a ni.

Minister chuan result a hun taka chhuah a nih theih nana buaipuitu MBSE te, school zirtirtute, zirlai nu leh pate, khawtlang leh zirna kaihhnawiha theih tawp chhuahtute zawng zawng chungah lawm thu a sawi a. Mizoram zirnain hma a sawn zel theih nana theih tawp chhuah chhunzawm zel turin zirna kaihhnawiha thawktu zawng zawngte a sawm bawk a ni.