February 15, 2023; Horti changtu, chief minister Zoramthanga tarlan danin, Mizoram sawrkarin Mau chi (Bamboo species) chi hrang hrang pathum a lei a, a vaia lei zat chu 8,49,425 niin, sum sen zat Rs. 6,48,16,750 a tling. Mau tiakte hi NBM, NEC leh SEDP fund atanga lei an ni.

Assembly Budget Session neih mek a Serchhip bialtu MLA Lalduhoma zawhna, Horticulture department changtu, chief minister Zoramthangan ziaka a chhan danin, Mau chi te chu supplier 4 - Mizoram Bamboo Producer (MBP) - F. Lalhriatpuii, Bairabi Bamboo Nursery(BBN) - J. Lalmalsawma, Rokunga Kawlremi and Sons (RKS) - R. Lalfakawma leh Inter-stateMarketing Cooperational Services(IMCS) - F. Vanlalpeka te atanga lei an ni.

Mau chi 'Dendrocalamus brandisii' (Burma rua) lei nan Rs. 2,75,90,000 hman ni tawhin, 'Dendrocalamus sikkimensis (Rawmi)' lei nan Rs. 3,00,08,000 leh 'Dendrocalamus longispathus (Rawnal)' lei nan Rs. 72,18,750, a vaiin, Rs. 6,48,16,750 sen a ni tawh.

Heng atan hian Consultant Dr. Ksh Lal Bihari Singha, Professor, Manipur University rawih a ni a, rawih hun chhung hi kum khat atan niin, rawihna man zat hi Rs. 50,000.00 per annum a ni.