F. Vanlalpeka, IMCS Aizawl.

Mizoram hi India rama Mau (Bamboo) tamna state kan ni a, hetih mek lai hian hmasawnpuina tur kawngah te, a bikin, sumhnar neihna tur kawngah te kan hmang tlem hle thung. Mizoram chhunga kan thil neih (raw materials) tam ber ni hial tura ngaih a ni bawk. A hman tangkai dan tur te, hemi chuktuaha Project mumal zawk kalpui dan tur te kan zawn thuai thuai hi thil tul tak a ni.

Mizoram Mau neih dan te, Mizoram Mau dinhmun pawh hi kan hriat chian tlan a pawimawh tak zet a. Mizoramin Mau a neih mek hi Mau lian ni lem lo, hman ve theih ni si, kan Mau neih dan dinhmun a zira hmalakna (Bamboo project) pawh kalpui thiam a tul hle bawk.

Kan tun dinhmunah hi chuan Mau sawirik a nih tawh chuan nuih ti za tawk vel leka ngaih theih thil a la ni a. Ram mipui tam tak thlir dan chuan a buaipuitu bik te sum siam kual vel mai maina ang lek a la ni. Tunhma atanga Mizoram Sorkar kalpui dan te leh Mau sawngbawlna an lo kalpui tawhna zawng zawng bih chian hi chuan tawp san lohna rual a ni lo.

Mizoramin Mau kan neih zinga tam ber 90% hi Mautak a ni a, a chi dang kan neih hi chu a tladarh nasa a, a hmun hlang taka luhchilh theih a ni lo. Mautak ber pawh hi a dik chiah chuan a hmunpui ang tak taka a awmna hmun hi ram pilril, luhpawh harsatna hmun deuh vek a ni.

Mizoramin Mau kan ngah ber Mautak ber mai hi Ram Leilungfa ten a hman tangkaina tur, sumhnar taka siam tur hian kum 2015 atang khan kan luhchilh tawh a. Mautak Maupum/Mautlawn hralh ve tak tak turin a hralhna awmchhun Cachar Paper Mills lama pe turin inremna kan siam ve mai a. A sawia sawi mai hi chuan thil hi a a awlsam khawp mai.

Mizorama Mau tam ber sumhnar-a siam tur chuan Luitui hmanga phurh kual theih chauh a ni. Khawmuala Mau phurchhuak tur chuan Mau phurhchhuahna senso ngai leh Mau hralhna sen so a inmil lo. A tak ramah chuan Mizoram Mau neih ang ang hi rilru sen ngai tak a ni.

Chutiang zelin, Mizoramin Mau kan ngah ber Mautak tho hi Sunhnar nei tura kawng dangah her rem hram tumin India ramin Agarbatti Sticks mamawh tam zia hriain hma kan han la zui leh a. Mizoram Mau neihsa hmang tangkai turin Mautak bawk hi kan han luhchilh leh ta a.

Agarbatti Sticks siam tur chuan Mauchang bawk lai a hman theih lohva. A sei zawng hi 9 Inches lai a ngai bawk si a. Mautak hmanga siam tak tak tur chuan kan Mau tak hi a changkar a tawi/a zing lutuk a. A changkar sei deuh chin chauh la tur chuan a pan lutuk a, paih tur a tam lutuk. Mau changkar sei chin lah a lo pan tawh a, Agarbatti Stick hi Mau pawnlan a na leh Mau chhunglam a dil paih ngai a lo ni leh zel a. Mizoram Mautak ber chu Agarbatti Stick atana siam tur pawhin a la fuh leh ta chuang lova.

Mizoram Mau tam ber Mautak bawk hi kawng dangin kan kalpui leh ta a. Ram Leilungfate tana sumhnar siam nan Mizo ten Mautuai kan tih bik (a hming pangai Rawtuai- Bamboo Shoots) hmangin hma kan la zui leh a.

Mizoramah Mautuai awm hunlai hian ramchhung leh rampawn thawnchhuah tur khawp lak tak tak hman a ni lo. Mizoram hmun hrang hranga Chawhmeh kharchhawngho hnangfak tawk bak lak kual tak tak hman a ni leh chuang lo.

Mizoram Mautak hi chu Project lian tham deuh, Paper Mills lam hawi dawn ila, a sawia sawi chuan a tha viau. Mahse kan tih tur atan chuan a fuh leh chuang lo. Hei ai chuan Bio-Fuel Project a fuh zawk. Hei ai mahin Mizoram Mautak hmanga khawvela Thing chang tha ber, Hardwood tluka tha Ply Wood leh a kaihhnawih awm thei hui veka luhchilh hi a fuh ber awm e.

Tichuan Mizoramin Mautak hman tangkai theihna Ha- hipa kan sawi thin chu a chiang deuh kuar ang. Khawvel ram changkang zawk ten Mau hmanga thil an dehchhuah runpuina ber te, Mau hman tangkai theih leh hlawk ber te, ram hmasawnna tura Mau hman tangkai theih ber chu Mau lian chi (Giant Bamboo Species) tih hi kan chian fo a ngai.

Mizoramin Mau lian kan tih, Rua lam chi (Derdrocalamus Species) zingah Phulrua (D. Hamiltonii) kan nei a. Hei aia lian zawk Mizoramin khawvela Mau lian ber zinga pathumna Rawmi (Giant Bamboo - D. Sikkimensis) kan nei ve tlat mai.

Mizoramah hian kan Mau neihsa hmang tangkai tur chuan Mau lian ber chi law law hi buaipui tel bawk ila. Mi nawlpui hman tangkai theih, heng Rawtuai lian, Agarbatti Stick, Bamboo Charcoal, Furniture etc..ho tana hman tangkai theih chi hi kan pawimawh tak zet.

Khawvela Mau lian ber D. Sinicus leh pahnihna D. Gigantieus leh pathumna D. Sikkimensis Mizoram Mau lian ber te hi IMCS Agribusiness hian a buaipui chho mek a ni.

Mizoramah Mau (Bamboo) kan buaipui tak tak dawn a nih chuan, tuna kan neih mek te hi chu kal khatin kal se la, heng kan neih tawh sa zuizui si hian Mau lian chi law law hi sumhnar lian tak siam zui nan a chinna hmunpui (Giant Bamboo Plantation) kan neih chhoh hi Central Sorkar National Bamboo Mission (NMB) duh dan pawh a ni si a. Mau hman hleih theih loh, hlawk bawk si lo, State thenawmte ran chauhva kan thlah zalen em em si hi chu tih dan tha zawk chak taka kalpui a ngai.

Mau lian kan tih Raw lian ho reng reng pawh hi a pum len theihna, thankin khawpa tharchhuak thei tur chuan hmun sang lam tehna (Altitude/Elevation) a tangin mamawh chin a nei a. Duhna lai laia phun ngawt chi a ni lo. A tlakna leilung turah, a tlangpuiin, Tuifinriat level atanga tehin, Altitude 700 m - 2000 m. chho hi Mau lian thankin khawpa puitling tura a chin theihna hmun tur chu a ni.

Hetiang hi Mau hmanga kan kal dan tur leh Mau atanga Central Sorkar atanga chhawmdawlna sum tam tham tak hmu tura kan kalpui dan tur chu niin a lang.

   Mizoramin kan tualchhung Mau leh Rua a neih mek te hi sumhnar hmuh theih nana kan remfel hi a tul a, Central Sorkar sum hailuh nan chauhva hmang lova, heng sum kan hailuh te hi Ram Leilungfate sumhnar siam zui nan ngei hmang tura Mau kan buaipui hi thil tul tak a ni.

   Mizoramah hian Mau hman tangkai tul zia thu te, Bamboo Processing Project thu te kan sawi kan sawi si thin a, kan kalphung leh kan Mau neih dan dinhmun hi chiang zawkin hria ila. Mau (Bamboo) hmang tangkai tur hian "thu chauh, hla chauh" hi a tawk lo hle.

   Chuvangin, a tak rama thil ti tak tak tur chuan MAU LIAN CHI (Giant Bamboo Spicies) tinzawn zel hian kan Sawrkar pawh hi kal thei se a tha tawh mang e.