Aizawl: Mizoram Pollution Control Board (MPCB) chuan OIL India Ltd. ten Maubuang lei an verhna bul luia phuan awm chu a sample lain an endik a, thil diklo leh hlauhawm an hmu lo. MPCB thawktute hnen atanga Zalen thudawn danin OIL te leiverhna bul luite pahnih ah thil phuan nasa tak a awm vangin lui tui hi endik a ni a, mahse thil diklo emaw, ngaihthatlohna tur engmah hmuh an neilo tih an sawi. MPCB Secretary C.Lalduhawma chuan, "Tui thianghlim, intlak pangngai hi a tehna ang chuan 7 tur a ni a, Maubuang a tui kan endik hi 6.9 a ni a, a thur lo a, a al bawk lo a, chuvangin a thianghlim ah kan ngai a, ngaihthatlohna tur kan hmu lo a ni," a ti. MPCB chuan OIL te thil hman ah phuan siam tur a awm an hriatloh thu leh OIL lam pawh lo in enfiah ve tura an hrilh thu an sawi bawk.