ZALEN, October 29, 2025: Kum 15 leh thla nga mi niin Zoramthari Renthlei chuan Thawhlehni khan Yonex-Sunrise All India Junior Ranking Badminton Tournament 2025 mixed doubles-ah medal lain Mizo zinga ram pum huap inelnaa kum 19-na hnuai huanga badminton-a medal hlawh chhuak thei naupang ber a ni thar.

Champhai Vengthlang tleirawl, Thartei hi October 22 atanga Madurai, Tamil Nadu-a khelh inelnaah hian Sainunmawia Sailo nen inkawmah mixed doubles-ah hian bronze medal an vaw chhuak a ni. 

Chanmari West rawlthar, Thazuala hian kum 16 mi niin ram pum huap junior inelnaah hian medal lain Mizo zinga la thei naupang ber a lo ni tawh a, Thartei hian a khum ta a ni.

Inelnaah hian Mawia leh Thari te hian round hmasa berah Aksh Singh leh Ananya A. te hmachhawnin 6-21, 22-20, 21-19-in an hneh hram a. Round of 16-ah Seeded No. 4 Karamat ul-Haq Mohammed leh Deepika Devanaboina te tangdun chu 21-16, 21-9-a hnehin awlsam takin quarterfinal an lut.

Quarter final-ah Seeded No. 7 Divyansh Agrawal leh Skledeep Kour te inkawp tum lehin 21-18, 21-18-a hnehin semi final an lut.

Final luh inchuhnaah hian Harish Ragavendiran V. leh Rubika Kumaran te tangdun hmachhawnin game hmasa ber an hloh hnuah game hnihnaah an tho chhuak a. An chak tlang mai dawn emaw tih turin deciding game-ah 17-14-in hma an hruai hman a; mahse, 11-21, 22-20, 17-21-in tawnhriat nei tha zawk an ngam ta lo a ni.

Ramhlun Venglai, Aizawl rawlthar, Mawia hi Malsawmhlua nen boy’s doubles-ah an inlan a, round of 16 an thleng bawk a. H. Lalrinhlui leh a partner pawhin mixed doubles-ah round of 16 tho an thleng bawk.

Mizoram Badminton Association (MBA) chuan Mizoram tihmingthaa medal la thei player an belh chu an lawmawm a tih thu leh an chhuan thu a sawi a. Hmasawnna nasa zawk leh hlawhtlinna ropui zawk nei zel turin duhsakna a hlan bawk.