ZALEN Oct. 21, 2024; Mizoram Maxi Cab Owners' Association (MMCOA) in oil man sang ti hniam tura phutna an thlawp a, October ni 23, 2024 (Nilaini) atangi an service dawn lo.

Vawiina thuchhuah an siamah, MMCOA chuan Mizoram Commercial Vehicle Union (MCVU) in oil man sang lutuk ti hniam deuh tur leh Mizoram chhung inkalpawhna kawngpui chhe lutuk zualpui tal siam tha thuai tura sawrkar an ngenna chu tihhlawhtlin a nih loh avangin, lungawi lohna lantir nan 'October ni 23, 2024 (Nilaini) zing dar 6 atangin Mizoram chhunga Commercial Vehicle zawng zawng tiamchin awm lo a tlan loh nise,' a ti a.

Hei hi MMCOA Gen. Hqrs. pawhin a thlawp a, Maxi Cab a ei zawngtu zawng zawng ten theih tawp chhuah a lo tawiawm turin an inngen a, an service theih dawn loh avangin mipuite hriatthiamna an ngen bawk.