Aizawl: Mizoram MaxiCab Owners Association chuan sawrkara an thil phut fare tihsan leh all Mizoram permit tihtawp pek leh phuta lungawi loh an lantir mek chu nimin tlai dar 5 khan an titawp. Zalen palaiin MMOA General Secretary Laldinliana Sailo a biaknaah MPCC Driver Welfare chu Zirtawpni khan palaiin an lo leng tih a sawi a, inkawmna an nei tih sawi mahse sawrkar lam atanga thu lawmawm an la hriat loh avangin nawrh chu chhunzawm zel an tum tih a sawi a.?Hetih lai hian Mizoram inthlanpui puan anih tak avangin sawrkar tharah lo chuan an thil duh hi ngaihtuah theih a nih dawn loh bakah mipui harsatna an siam hnem tawh bawk avangin nawrh hi tihtawp an rel ta niin a sawi. Hetih lai hian Transport Department hotute chuan tunhnai lawkah Maxicab chuan man chu tihsan a nih avangin tihdanglam leh a theih an rin loh thu an sawi. Transport department hotute chuan Maxicab chuan man metal-ah KM khat Rs. 2.20 ni thin chu May 22, 2018 atangin Rs. 2.50 leh metal lohah KM khata Rs. 2.50 ni thin chu Rs. 2.75-ah tihsan a ni tih an sawi. Rate san dawnin fuel man zat, thil man san dan leh mipui ngaihdan te uluk taka an ngaihtuah hnuah an siam chauh thin tih sawiin hmanni lawka tihsan hnuah kum khat em pawh a la tlin hmaa tihsan leh chu mipui tan phurrit a ni dawn niin an sawi a. Maxi cab nawrh tum chu engmah an hriat loh avangin an tan hmalak ngaihna a awm lo tih an sawi bawk. Maxicab neituten special permit lak har anga an sawi pawh minute 10 chhung velin an peihfel hman vek niin Zalen an hrilh bawk. Chhinchhiah danin Mizoram pumah Maxicab 3200 chuang an awm a, state danga tlan Maxicab te chuan nawrh hi an zawm ve lo nia thudawn a ni.