Aizawl: Aizawl Municipal Council-in March ni 2,2015 atanga Maxicab te Aizawl khaw daifem a ding tawh tura a tih chuan zawm a hlawh lemlo hle a. AMC Executive Councillor,Control of Parking and Collection of Parking Fee changtu Rosiamngheta chuan maxicab te chu an ngenna ngai pawimawh se a duh tih a sawi. Zalen palaiin Aizawl khawpui a fankualnaah a hma ai chuan zing karah maxicab te hi hmuh tur an tlem zawk a; mahse, dan pangngaiin an counter leh stand atangin khualzin kal leh haw tur an la tho a, zing dar 6 hnu lama passenger nghak pawh engemaw zat an la awm tho a ni. Zalen palaiin a kawmnaah Courter nghaktu pakhat chuan AMC-in maxicab stand thar a siam chu mipui tan phurrit a ni tih sawiin, "Khualzinten sumo man aia tam taxi fare-ah an sen a ngai thin a, mipui tan tihngaihna a awm lo a ni," a ti a. Zing dar 6 a chhuak thin motor te chu dar 5 velah an chhuak mai tawh thin tih sawiin AMC thutlukna lo siam tawh chu sut leh turin an ngen dawn tih a sawi bawk. AMC Executive Councillor,Control of Parking and Collection of Parking Fee Rosiamngheta chuan tha taka AMC ngenna chu zawm mai turin maxicab neitute chu a ngen tih Zalen a hrilh a. "Tawngkam thaa kan tih lai hian awih mai se ka duh a, kan thu awihlo chu man an nih pawhin min dem lo se ka ti a. Thu awihlo te chu motor ke thlawn leh head light tihkeh thlengin hma kan la dawn a ni," a ti a. AMC thutlukna chu court ah khin theih a ni lo niin a sawi bawk. Rosiamngheta chuan maxicab neitute chu motor chuan man tihniam ve turin a ngen tih a sawi bawk a, "Motor chuan man hi kilometer a teh a ni a, tunah hian thingtlang sumo te hi Km 3 velin an khua kan sawn hnaih sak vek a, chuvangin motor neitute hian mipui an hmangaih anih chuan a chuanman hi tihbniam ve turin ka phut a ni," a ti bawk. Rosiam-ngheta chuan parking fee pawh tihsan an tum nia sawiin city bus te pawh tun aia an timing tirang turin an ngen dawn tih a sawi bawk.