Mizoram Badminton Association hnuai a session khat chhunga inelna hnuhnung ber leh ranking point pu hnem ber, session tluan ranking tournament hrang hrang a ranking point khawl hnem leh nei sang pariat te in elna, MBA Finals 2022 chu ni 29. 3. 2022 – 1. 4. 2022 chhung khan Ramhlun Indoor Stadium ah khelh a ni a, Men’s Singles ah Samuel Lalnunmawia, Mizoram Police Badminton Club (MPBC) champion in, Women’s Singles ah Zothansangi, Ralte Villa Badminton Club chu a vawi khat nan tournament lianah a champion a, MBA final-ah hian taksa lam harsat vanga hun rei tak chawl tawh Tuikual South tlangval Samuel Lalnunmawia chu ropui taka rawn kir lehin Men’s Single bakah Men’s doubles-ah a champion a, Mizo hmeichhe shuttler hriat hlawh F. Vanlalhriatpuii  chu category pahnihah champion bawkin tournament chhunga langsar ber an ni. 

Samuel-a a che ropui
Men’s singles final hmunawm leh hautak takah MPBC player Samuel Lalnunmawia, Tuikual South chuan deciding game-ah Joseph Lalhruaitluanga (Jojo-a), Bawngkawn Badminton Club (BBC) chu hneh in, MBA official tournament-ah a vawi 38 nan a champion a. Kum lama upa zawk ni mah se tawnhriat ngah zawk anihna hmang tangkai in Samuel-a’n game fing tak a khel a, a fitness pawh a tha hle. Men’s doubles ah Samuel-a leh a partner Lalmuanawma (MPBC) te chuan Lalrinawma leh Laldintluanga Tlau (BBC) te tangdun chu hneh bawk in, Samuel-a hi tun tournament ah category hnih ah a champion thei a. A thahrui ngahna, tumruhna leh taimakna avangin session khat chhunga tournament lian ber ah double champion a ni thei a ni.

Hmeichhe lam champion thar Sangsangi
Women’s singles inelna lam ah MBA in champion thar a nei a, chu chu Saron Veng nula Zothansangi (Sangsangi) a ni. Ani hian final inkhel hmuhnawm tak ah Rebek Lalremruati, Mission Veng chu deciding game ah a hneh a, a vawi khat nan MBA ranking tournament ah a champion. Sangsangi hi kum 20 lek a upa a la niin ani hian Assam Badminton Academy, Guwahati ah coaching a kal mek a, tournament zawh hian academy hi a zawm leh dawn a ni. 
  

Final-a a tumpui Rebek-i hi kum 15 lek a upa a ni bawk a, ani hi Mission Veng Badminton Academy (MVBA) a inzir mek niin Women’s doubles lamah final a lut bawk. 

Double Champion Hriati
Women’s doubles ah F. Vanlalhriatpuii leh Lalrinzuali, Ralte Villa Badminton Club te chuan Agnes Lalawmpuii, BBC leh Rebek Lalremruati, MVBA te tangdun an hneh a, Mixed doubles lamah Lalnunhlua leh F. Vanlalhriatpuii (Ralte Villa BC) te tangdun chuan Joseph M. Lalrinawma leh Lalrinzuali (Ralte Villa BC) te an hneh bawk. Saron veng nula Hriati hi tun tournament ah hian category hnih ah champion in, Mizoram badminton chanchin ah hetiang dinhmun a ding thei mi tlemte zingah a tel thei a ni.
Ralte Villa el phak an awm lo
   

MBA in session tluan a official tournament a buatsaih hrang hranga champion hnem ber club hnenah “Overall Champions Trophy” a pe a, chu lawman dawngtu chu Champhai District Badminton Association hnuai a affiliation nei Ralte Villa Badminton Club a ni. 
   

Tun session hman zawh takah MBA hian official tournament vawi 5 a buatsaih a, chungte chu: Kolasib Open, Serchhip Junior Rankling Tournament, MBA Official Championship, Champhai Masters Championship leh MBA Finals te hi a ni a. Category hrang hrang, under – 9 Boy’s and Girl’s singles atanga 60+ Men’s doubles inkarah inelna hi neih a ni.         Heng tournament a category hrang hranga champion hnem ber chu Ralte Villa hi niin, anni hian chawimawina nopui leh tangkai fai lawman atan an la a ni.
   

MBA finals result kimchang chu a hnuai ami ang hi a ni:
Mixed doubles 
Champions:
Lalnunhlua & F Vanlalhriatpuii, RALTE VILLA
Runners Up: 
Joseph M Lalrinawma & Lalrinzuali, RALTE VILLA
Women’s doubles:
Champions: F Vanlalhriatpuii & Lalrinzuali, RALTE VILLA 
Runners Up: Agnes Lalawmpuii+Rebek Lalremruati, BBC/MVBA
Men’s doubles:
Champions: 
Lalmuanawma & Samuel Lalnunmawia, MPBC Runners up: Laldintluanga Tlau & Lalrinawma, BBC
Women’s singles:
Champions: Zothansangi, RALTE VILLA 
Runners up: Rebek Lalremruati, MVBA
Men’s singles:
Champions: Samuel Lalnunmawia, MPBC
Runners up: 
Joseph Lalhruaitluanga, BBC