Mizoram Badminton Association (MBA) Official Junior Championship 2023 chu Inrinni khan zawh fel a ni a, a rualpui zinga India ram huap pawha langsar phak, H. Lalthazuala bawk a che ropui leh a. H. Lalrinhlui leh Malsawmhlua (Mama) ten inelna chi thumah final an lut bawk

Thazuala bawk a langsar
Kar hmasaah khan Chanmari West rawlthar, Thazuala hian Mizorama mipa maltana champion thei naupang ber nihna a chelh zo chiah a, junior inelnaah pawh a che ropui chhunzawm hle nghal.

Ralte Villa BC tana khel mek hian U-17 Boy’s Singles final-ah C. Lalramsanga, Durtlang, Ralte Villa BC chu 21-15, 21-17 a hnehin a champion a. U-19 Boy’s Singles-ah tun tournament khel tha tak, kum 15 mi leh, Sainunmawia Sailo, Ramhlun Venglai, Bawngkawn Badminton Club (BBC) chu 21-12, 21-19 a hnehin a champion bawk.

Final-a inhmachhawnte hi Tata Trust (Northeast Initiative Development Agency - NEIDA) hmalaknaa Pullela Gopichand Badminton Academy (PGBA), Hederabad, Telengana-a inzira awm mek an ni hlawm a. Thawhtanni hian an zirna hmun an pan lehnghal dawn a, ram pum huap inelna liana khel turin an inbuatsaih chhunzawm nghal dawn a ni.

Kum 15 mi chauh la ni, Thazuala hi kumina All India Sub-junior Under-15 & Under-17 Ranking Badminton Tournament, February-a Jaipur, Rajasthan-a khelhah leh June thla tawpa Lucknow, Uttar Pradesh-a Yonex Sunrise All India Sub Junior Under 15 &17 Ranking Badminton Tournament-ah Under-17 Boy’s Singles category-ah a lo champion a. Mizo zinga All India Sub-Junior Ranking Badminton Tournament-a Boys Singles category-ah vawi hnih champion thei awmchhun a ni a, a pianna ramah pawh a ropui chhunzawm zel.

Category pathuma final lut thei Mama leh Rinhlui
MBA danah tournament pakhatah a tam berah category pathuma tel theih a ni a. Kum 14 mi ve ve, Rinhlui leh Mama chu inelna chi thumah telin final an lut vek.

Kum 15 hnuai lam huanga la khel thei player pahnih zinga pakhat, Rinhlui, Chanmari West, Ralte Villa BC tana khel mek hi Under-15 Girl’s Singles, Under-17 Girl’s Singles leh Under-19 Girl’s Singles-ah te final a thleng vek a, U-15-ah championin, a dang pahnihah deciding game-ah chak lo ve ve thung a, pahnihna a ni.

Under-19 Girl’s Singles final-ah hian Rinhlui hian a aia upa zawk, Abigail Lalthazuali, Saron Veng BC chu 21-15, 18-21, 21-16 in a hneh lo va. Naupang zawk ni mah se deciding game-ah pawh hma a hruai zawk a; mahse, a tawp hun pawimawhah tawnhriat ngah zawkin a thahrui hmang tangkaiin a lehpel a ni.

Abi-i hi kar hmasaa inelnaah pawh khan hmeichhe maltanah champion-in vawi thum a zawnin a champion a. Oxford Higher Secondary School, Electric Venga pawl 12 zir mek hian mixed doubles-ah Joseph VL Ringngheta, Chanmari Shuttler Club (CSC) nen tangdunin an champion bawk.

Under-17 Girl’s Singles-ah pawh Rinhlui leh Mission Veng Badminton Academy chhulchhuak, Lalrinkimi ten final khelin deciding game-ah tho Rinkimi hian 13-21, 21-10, 22-20 in hnehna a chang.

Mama, Serchhip, Ralte Villa BC hi U-15 Boy’s Singles, U-15 Boy’s Doubles leh U-19 Boy’s Doubles-ah inlanin final a lut vek a, a hmasa pahnihah champion-in kum 19 hnuai lam huangah erawh pahnihna niin a champion zo ta bik lo thung.

Under-13 Boy’s Singles-ah Zothankima, Durtlang Leitan BC chuan 21-11, 21-13 a Abraham Lalnunthara, Ralte Villa BC hnehin a champion bawk.

RESULT KIMCHANG:
Under-19 Boy’s Singles:
Champion: H. Lalthazuala, Ralte Villa BC
Runner-up: Sainunmawia  Sailo, Bawngkawn BC

Under-19 Girl’s Singles:
Champion: Abigail Lalthazuali, Saron Veng BC
Runner-up: H. Lalrinhlui, Ralte Villa BC

Under-17 Boy’s Singles:
Champion: H. Lalthazuala, Ralte Villa BC
Runner-up: C. Lalramsanga, Ralte Villa BC

Under-17 Girl’s Singles:
Champion: Lalrinkimi, Mission Veng Badminton Academy
Runner-up: H. Lalrinhlui, Ralte Villa BC

Under-15 Boy’s Singles:
Champion: Malsawmhlua, Ralte Villa BC
Runner-up: Vanlalhruaia Sailo, Bawngkawn BC

Under-15 Girl’s Singles:
Champion: H. Lalrinhlui, Ralte Villa BC
Runner-up: Zoramthari, Ralte Villa BC

Under-13 Boy’s Singles:
Champion: Zothankima, Durtlang Leitan BC
Runner-up: Abraham Lalnunthara, Ralte Villa BC

Under-13 Girl’s Singles:
Champion: K. Lalrempuii, Hmingsanga BC
Runner-up: Lydia Lalnunfeli, Saron Veng BC

Under-11 Boy’s Singles:
Champion: Abraham Lalnunthara, Ralte Villa BC
Runner-up: Samuel Laldinpuia, Mission Veng BA

Under-11 Girl’s Singles:
Champion: Lalthakimi, P&E Veng BC
Runner-up: Lalnunhlui, Mission Veng BA

Under-19 Boy’s Doubles:
Champion: C. Lalramzauva, CSC & Lalnuntluanga, NSBC
Runner-up: Malsawmhlua, Ralte Villa BC & Mano Malsawmdawngliana, BBC

Under-17 Boy’s Doubles:
Champion: Isak Vanlalhmangaiha, Serchhip BC & Vanmalsawmzuala, NSBC
Runner-up: Joseph Lalmuansanga, CSC & Lalzuidika, Lalat BC

Under-15 Boy’s Doubles:
Champion: Malsawmhlua, Ralte Villa BC & Vanlalhruaia Sailo, BBC
Runner-up: Joel Lalramdinmawia, BCR & Robert Lalruatsanga, HSBC

Under-13 Boy’s Doubles:
Champion: Denis Romawia Rivung, KNBC & K. Liansangzela, RUBC
Runner-up: Lalruattluanga Tlau, BCR & Steven Malsawmkima, Hlimen BC

MBA Official Junior Championship hi
Thawhlehni atanga Mission Veng Indoor Stadium-a khelh tan inelnaah hi MBA leh Mission Veng Badminton Academy tangkawpin Mizoram State Sports Council (MSSC) puihnaa an buatsaih niin category 14-ah player 182 zet an inlan a, inkhel 216 zet a awm.

MBA hian kar hmasa khan MBA Official Senior Championship 2023 a buatsaih tawh a, junior hi a chhunzawmna niin Mizo naupangten kum dik taka an khelh theih nan birth certificate leh Aadhaar Card original kentir niin an khelh dawn apiangin a inmil em tih endik zel a ni.

Tun hma chuan MBA Junior leh Senior Official Championship hi a ruala huahawt thin a ni a. Player tel thei an lo thahnem tak avang leh hmunhmaten a dawl zawh tak thin loh avangin a hrana buatsaih a ni ta thin a ni.

Tata Trust (NEIDA) leh MBA thawh hona avangin Mizo naupangten badminton an uar zel a. Theihna sang tak an nei a ni tih pawh hriain India ram hmun hrang hranga academy lian leh thate pawhin Mizoram lam an hawi tan viau a. Heng bakah Mizoram hmun hrang hrangah grassroot coaching centre leh regional development centre te a lo awm belh zel bawk a. Heng vang hian badminton hian Mizoramah pawh hma a sawnin ngaihventu an pung a, tournament-a tel pawh an thahnem chho hle zel a ni.

Kumin inelna pawh hi a hmuna entu an thahnem thei hle a, MBA hruaitute bakah Tata Trust atang leh badminton tuipuitu mi chi hrang hrang hmel hmuh tur a awm bawk.