Saron Veng Badminton Club leh Mizoram Badminton Association (MBA) tangkawp huaihawt, Thawhlehni atanga MBA Junior Ranking Badminton Tournament khelh tan chu Inrinni khan Ramhlun Indoor Stadium-ah khelh zawh a ni a. Category 13-a inelna buatsaihah hian player 200 chuang inlanin Chanmari Shuttler Club-a khel mek, C. Lalramzauva, Durtlang chu category hautak ber leh ngaihhlut ber pahnihah champion kawpin, double champion nomawi a hawn.

Ramzauva a che tha
Under-19 Boy’s Singles-ah Seeded No. 1. C. Lalramzauva leh No. 2. Lalnuntluanga, New Serchhip Badminton Club ten final an khel a. Tata Trust (NEIDA) bultuma ITM University, Raipur-a inzira awm reng tawh ve ve an ni a, an inhrechiangin an lo inhmachhawn fo tawh thin a. Tun tumah erawh Ramzauva hian 21-5, 21-10 in hnehna a chang.

U-19 Boy’s Doubles-ah an pahnih hian an tang dun thung a, tun hnai lawka National Junior Championship-a lo inkawp tawh leh India ram inelna sangah pawh pre-quarter final hial thleng tawh an ni a. Final-ah hian C. Lalrohlua, Chaltlang Badminton Club leh Mano Malsawmdawngliana, Bawngkawn Badminton Club te tangdun chu 21-2, 21-19 a hnehin an champion.

Hmel thar champion
MBA level tournament-a a khelh vawi khat inlannaah Tirza Lalremruati, Kolasib District Badminton Association (KODBA) chu U-13 Girl’s Singles-ah a champion nghal.

Final-ah hian K. Lalrempuii, Hmingsanga Badminton Club nen intumin 21-16, 21-15 in hnehna a chang a, a vawi khat tournament lian khelhnaa a champion theih hi a ropui hle.

Hetih lai hian final-a a hneh tak, Rempuii a vanduai a, category pathum - U-13 GS, U-15 GS leh U-15 GD-ah te final a lut vek a; mahse, a vanduai zawkah a tang vek.

Under-13 Boy’s Singles-ah Zothankima, Dutlang Leitan Badminton Club a champion a, U-13 Boy’s Doubles-ah Lalruattluanga Tlau, BCR nen final lut tho mah se Dennis Romawia Rivung, KNBC leh K. Liansangzela, RUBC te lakah hnehna an chang zo lo.

Result dangte
Under-19 Girl’s Singles-ah Ramngaihzuali, Ralte Villa BC-in Zoramthari, Ralte Villa BC vek chu 12-21, 22-20, 21-9 a hnehin a champion a. Zoramthari hian kum bithliah inelnaah U-15 huanga la khel thei a ni a, girl’s singles-ah hian chiang takin a champion nghe nghe.

U-11 Girl’s Singles-ah Lalthakimi, P&E Veng BC, Serchhip a champion a, U-11 Boy’s Singles-ah Abraham Lalnunthara, Ralte Villa BC a champion bawk.

Under-17 Boy’s Singles-ah Vanlalmalsawmzuala, New Serchhip BC-in Isak Vanlalhmangaiha, Serchhip BC chu final-ah 22-20, 21-18 in a hneh bawk.

U-13 Girl’s Doubles-ah Lalremtluangi leh Norah Lalrinzuali, Saron Veng Badminton Club chuan Anna Lallawmzuali leh Loicy Ramchullovi, SBC vek te tangdun hnehin champion an ni a. Norah-i leh Anna-i te hi unau an ni a, tun tournament-a final inelnaah unau intum awmchhun an ni.

Result kimchang:
U-19 Boy’s Singles:
Champion - C. Lalramzauva, Chanmari Shuttler Club
Runner Up - Lalnuntluanga, New Serchhip BC

U-19 Girls’s Singles:
Champion - Ramngaihzuali, Ralte Villa BC
Runner Up - Zoramthari, Ralte Villa BC

U-19 Boy’s Doubles:
Champion - C. Lalramzauva, CSC & Lalnuntluanga, NSBC
Runner Up - C. Lalrohlua, Chaltlang BC & Mano Malsawmdawngliana, Bawngkawn BC

U-17 Boy’s Singles:
Champion - Vanlalmalsawmzuala, New Serchhip BC
Runner Up - Isak Vanlalhmangaiha, Serchhip BC

U-15 Boy’s Singles:
Champion - Joel Lalramdinmawia, Badminton Club Republic
Runner Up - Remruatkima, Hlimen BC

U-15 Girl’s Singles:
Champion - Zoramthari, Ralte Villa BC
Runner Up - K. Lalrempuii, Hmingsanga BC

U-15 Girl’s Doubles:
Champion - Esther Lalchhanhimi & K. Lalzarmawii, Kolasib District BA (KODBA)
Runner Up - K. Lalrempuii, HSBC & Lydia Lalnunfeli, Saron BC

U-13 Boy’s Singles:
Champion - Zothankima, Durtlang Leitan BC
Runner Up - Liansangpuia, Lawngtlai District BA (LTDBA)

U-13 Girl’s Singles:
Champion - Tirza Lalremruati, KODBA
Runner Up - K. Lalrempuii, HSBC

U-13 Boy’s Doubles:
Champion - Dennis Romawia Rivung, KNBC & K. Liansangzela, Ramhlun United BC
Runner Up - Zothankima, DLBC & Lalruattluanga Tlau, BCR

U-13 Girl’s Doubles:
Champion - Lalremtluangi & Norah Lalrinzuali, SBC
Runner Up - Anna Lallawmzuali & Loicy Ramchullovi, SBC

U-11 Boy’s Singles:
Champion - Abraham Lalnunthara, Ralte Villa BC
Runner Up - V. Lalremruata, Ramhlun United BC

U-11 Girl’s Singles:
Champion: Lalthakimi, P&E Veng BC, Serchhip
Runner Up: Lalnunhluni, Mission Veng Badminton Academy