Mizoram Badminton Association (MBA) leh Bawngkawn Badminton Club (BBC) tangkawpin Thawhlehni atanga Bawngkawn YMA Hall-a MBA Official Championship Badminton Tournament 2023 – Senior chu Inrinni khan zawh fel a ni ta a. Mipa maltanah India rawlthar zinga thiam ber, H.Lalthazuala chu Mizoramah pawh a thiam ber a ni zui a. Hmeichhe lamah Abigail Lalthazuali a ropui zel a, ngamtu an la awm thei lo.

India champion tan record thar
Men’s singles-a player 60 zet inel zingah tun hnai lawka India ram pum kum 17 hnuai lam inelnaa vawi hnih champion thei, Chanmari West rawlthar Thazuala chu Ralte Villa Badminton Club (RVBC) tana inlanin a champion a. MBA senior ranking tournament a khelh vawi khatnaah a champion nghal a ni.

Hei mai a ni lo va, Pullela Gopichand Badminton Academy (PGBA), Hyderabad, Telengana-a inzirna awm mek, kum 16 leh ni nga mi chauh a la ni, Thazuala hi MBA mipa maltana champion thei naupang ber a ni a, record thar a siam nghal.

Thazuala hian final thleng turin a kalkawngah Seeded No. 1 Malsawmsanga (Esha) a pawh a hneh bakah thahrui ngah, Lalramdinthara Pachuau a vaw thla a. Semi final-ah Zarzokima hneh lehin final-ah hian C.Lalramzauva, Chanmari Shuttler Club (CSC) chu straight set-in a hneh a ni.

Mizoram mai ni lo, India chhuanvawr ni mek, Thazuala hian tun karah MBA Official Championship Badminton Tournament 2023 - Junior a khel chhunzawm dawn a, hemi hnuah hian PGBA-ah a let lehnghal ang a, ram pum huap inelnaa inlan turin a inbuatsaih zel dawn a ni.

Saron Veng tleirawl Abi-i a pui
Saron Veng Badminton Club (SBC) tana khel, Abi-i’n hnuhma tha a neih tawhna inelnaah chanchin chhinchhiahtlak hnutchhiat belhin vawi thum a zawnin hmeichhe maltanah a champion ta a, hneh theitu an awm rih meuh lo.

Oxford Higher Secondary School, Electric Venga pawl 12 zir mek, Abi-i hian hmeichhe final-ah hian an veng nula tho, RVBC tana khel, Lalrinhlui chu 21-18, 22-20 in a hneh a. Zirlai a la nih avangin amah duhsak thintu an zirtirtute chungah lawmthu a sawi.

Hei mai a ni lo va, Joseph VL Ringngheta (CSC) nen mixed doubles-ah tangdunin player tawnhriat ngah, Lalbiaksanga (Mizoram Police BC) leh Lalduhzuali (Durtlang BC) te inkawp chu 15-21, 21-16, 21-11 a hnehin an champion bawk a. Mizorama inelna lian berah nomawi pahnihna a hum haw a ni.

Joseph-a pawhin doubles nomawi pahnih
Mixed doubles-a Abi-i nena champion, Kulikawn tlangval, Joseph-a pawhin nomawi pahnih a hum haw a. Mipa doubles-ah Lalramzauva, Durtlang nen tangdunin Seeded No. 2 an ni a. Final-ah Seeded No. 1 Lalrinawma (Bungkawn) leh Laldintluanga Tlau (Republic Vengthlang), BBC tana khelte chu 16-21, 21-15, 21-14 a hnehin an champion ni.

Hmeichhe doubles-ah Seeded No. 1 Lalrinhlui leh Zothansangi (RVBC) te inkawpin Seeded No. 3 Lalvenhimi (Chaltlang BC) leh Ramngaihzuali (RVBC) te tangdun chu 21-18, 21-19 a hneh in an champion bawk.

Ngaihhlut hlawh inelna
State championship hian ngaih pawimawh leh ngaihhlut a hlawh a, Badminton Association of India (BAI) pawhin calendar-a a dah a ni a. Category panga - Men’s singles, Women’s singles, Men’s doubles, Women’s doubles leh Mixed doubles-ah te inelna neih a ni.

MBA-in ranking system a kalpui danah official championship hian double point a pu a, lawmman sumfai tamna ber tournament a ni tel bawk a, hei vang hian ngaihhlut a hlawh.

Ngaihhlut a hlawh avang hian Mizoram pawna inzira awm mekte pawh he tournament-a inlan tur hian an haw phalsak an ni a. PGBA leh ITM University Badminton Academy-a zirlai Mizo naupangte pawh an haw khawm.

Hei mai a ni lo va, MBA-in a thawhpui, Tata Trust leh PGBA-ten Mizo naupang inzir mekte an inzirnaa insawr bing tura an duh avangin season khat-ah state level tournament pakhat bak an khelh a rem ti tawh dawn lo niin a lang a. Hei vang hian heng academy-a Mizo player-te hi an khelh châk ber championship khel tur hian an haw a ni.

RESULT KIMCHANG:
Men’s Singles:
Champion: H. Lalthazuala, Ralte Villa Badminton Club
Runner-up: C. Lalramzauva, Chanmari Shuttler Club

Women’s Singles:
Champion: Abigail Lalthazuali, Saron veng Badminton Club
Runner-up: Lalrinhlui, Ralte Villa Badminton Club

Men’s Doubles:
Champion: C. Lalramzauva & Joseph VL Ringngheta, Chanmari Shuttler Club
Runner-up: Lalrinawma & Laldintluanga Tlau, Bawngkawn Badminton Club

Women’s Doubles:
Champion: Lalrinhlui & Zothansangi, Ralte Villa BC
Runner-up: Lalvenhimi, Chaltlang BC & Ramngaihzuali Ralte Villa BC

Mixed Doubles:
Champion: Joseph VL Ringngheta, Chanmari SC & Abigail Lalthazuali, Saron BC
Runner-up: Lalbiaksanga, Mizoram Police BC & Lalduhzuali, Durtlang BC