Ligue 1 lama point 16 zeta hmahruai fal turin zirtawpni zan khan Kylian Mbappe chuan Rennes lamah a team Paris St Germain tan minute 92 naah goal a thun a, point 3  hlawh chhuakin league hma hruaitu an ni chhunzawm zel. An tumpui Rennes te hian table lamah pangna an hauh thung. 

Thawhlehni zana Real Madrid mikhual tur PSG hi tunah point 16-in Ligue 1 lamah an sang fal tawh a, zanin lama an khelh tur table-a pahnihna Marseille an hmachhawnna turah a player tha te an chawlh hahdam tir ngam dawn em a hriat loh. 

He inkhelha inlan lo Neymar Jr chu an chhawr lo a nih pawhin Real Madrid nena Champions League round of 16 an khelh hunah chuan a luh ngei a rinawm. 

He inkhelhah hian Rennes hian an goal an hum tlang teuh hle a, hun tawp dawn lama PSG ten counter attack hmangin an nawr let a, Lionel Messi-a ball siam sak tha tak chu Kylian Mbappe chuan goal-ah a lo chantir a ni. First-half tawp dawn lamah Mbappe hian goal post a pet per a, second-half-a a goal thun chu VAR hmanga endik a nih hnuah pawm sak a ni lo bawk.