Aizawl August 4, 2024 : Mizoram Business Coordination Committee (MBCC) chuan Mizorama sumdawngten income tax pek an tum lo tih an sawi.

Zirtawpnia MBCC thukhawm chuan Mizorama sumdawngten income tax thawktute hnen atangin income tax pe tura tihna lehkha leh a dangte an dawng tih sawiin hemi chungchangah hian income tax lama thawktute leh dan hre mite nen zirchianna zau zawk buatsaih tura hmalak mek a ni tiin, tumah lo chiai lo tur leh hetiang lama harsatna neite chuan MBCC hruaitute hrilh hre nghal vat thin turin an ngen.

MBCC thuchhuah chuan Mizoram kawtchhuah, Vairengte atanga Sairang four lane siam turah contractor-in hnathawk turin hmanrua an inchhawp tawh a, eng emaw rokhawlhna avanga an thawh mai theih loh avangin sawrkar-ah hnathawhna tur hmanraw dah mai mai man Rs. nuai 7,200 chawi turin a ti nia sawiin pawi an tih thu an sawi a. “Four lane hi siam a nih chuan Zofaten engkim man tlawm zawkin kan nei thei dawn a, Zoram mipui nghakhlel taka kan thlir Vairengte to Sairang four lane kawngpui siam theih loha a awm leh contractor pawhin a lo thlawna Rs. nuai 7200 lai mai sawrkar hnena a phut te, in-withdraw mai an duh tih thawm kan hriatte hi pawi kan ti a, thuneituten ching fel thuai se kan duh a, kan ngen a ni,” an ti.

Tunlai hian Mizoramah hnam dang dan loa sumdawng an tam leh hle tih MBCC chuan sawi bawkin, Mizo hming hawha hnam dang dawr leh Mizo hminga hnam dang motor register awm zawng zawngte MBCC chuan dan anga hrem an nih theih nan hmalak a tum a, dawr siam nan leh motor register nana Mizo hming hmantir zawng zawngte a rang thei ang bera Mizo hming an hmantirte titawp nghal turin MBCC chuan a ngen tih an sawi a. Hetianga Mizo hming hmanga hnam dang dawr leh motor register titawp lote chungah action lak a awm chuan mahni hnam hralha mahni hming hnam dang hmantirtute mawh a ni ang tih hre turin MBCC chuan a ngen tih an sawi bawk.