Aizawl: Mizoram Board of School Education (MBSE) in tun hnaia hmasawnna leh rahbi thar eng engemaw a neih chhoh mekte zirchiang turin Zirtawpni khan Chhattisgarh Board of Secondary Education, Raipur atangin Board Member pali an lokal.

MBSE Secretary leh Officer ten heng official lokal te hi lo dawngsawngin inkawm hona tha tak neih a ni a. MBSE hmunhma te fankual pui an ni bawk. Mikhual te hi MBSE hmalakna hrang hrang Bilingual textbook-te, Covid 19 hripui len avanga ram puma lockdown puan a ni chunga MBSE in HSLC leh HSSLC exam offline-a a conduct theih mai dante an lo hriat avanga zirchiang tura lokal an ni a.

MBSE-in school affiliation felfai taka a kalpui dan te, professional course (D.El.Ed.) a kalpui dan bakah Mizoram Teacher Eligibility Test (MTET) exam a conduct dan te, High School Leaving Certificate Examination (HSLC), Higher Secondary School Leaving Certificate Examinations (HSSLC) leh Diploma in Elementary Education (D El Ed) exam a buatsaih dante bakah hian MBSE-in a kalpui thar Digitalization and Integrated Digital Payment System hnuaia online hmanga naupang registration tih te, exam form fill up te, document verify te, online fee payment, online hmanga internal mark submit-na tur leh a dang tam tak duante chu tha an ti hle.