Mizoram Board of School Education chuan Matriculation Exam result lungawiloin answer sheet Right to Information Act hmanga dilchhuah tumna MBSE SPIO in a hnawl avang leh a hnua Departmental Appelette Authority in Board in a phalsak loh chu Mizoram Information Commission chuan thiah sakin answer sheet sum tam chawi ngai lovin a diltu hnenah a pekchhuah tir thu kar kalta khan Zalen chanchinbu headline a ni a. Zirlai hmakhaw hun khawih thui thei tak a nih avangin zirlai nu leh pa te atangin zawhna, selna, fakna kan dawng nasa a, mipui interest a nih vang niah ngaih mai chi a ni awm e. Heng thil thleng kan tawn atang hian zawhna 2 a rawn chhuak a. MBSE hian kalphung herrem a mamawh zia tilangtu niin a hriat a, naupang chanvo humhalhna, humaniterian ground leh dan atanga thlirin answer sheet mark peka lungawilo zirlaiah sum nei leh nei lo dinhmun a inthlau theiin a langa; rethei te dinhmun hi Sawrkar hnathawk te hian an hriatthiam pui lemlo a tih theih ang. MBSE Matric exam mark sheet tihchhuahah zirlai thenkhat chu an lungawi lo foa; subject khatah Rs 500 chawiin Board chuan answer sheet en a phalsak a, zirlaiin re-evaluate (mark ennawn) a duh chuan subject khat ah Rs 1,000 chawi tirin ennawn sak a ni bawk thin a. Mizoram Board of Shcool Education hi autonomous body a ni a, dan tesep siam thiang an ni. Answer sheet ena re-evaluate duhtute chu Rs 1000 chawia ennawn sak theih an ni a, an hmusang emaw a hniam emaw ennawnna chu an pawm a ngai tho tho tawh a ni. Hetiang ang lam kaihhnawih hi state dangah pawh buaipui hlawh tham a ni hrim hrim mai a. State dangah phei chuan inelna a sanga, buaipui a hlawh fo a, hnathawk hman loa answer sheet buaipuiin hun an khawh ral fo thin a. Court sang zawk te pawhin ‘75% lai hnathawk thei lo a paper ennawna hun khawhral chu ‘fuh lo’ tiin thutluknate a lo siam tawh thin bawk. Vawi engngemaw zah chu zirlai nu leh pate’n Board an khing a, thil tam tak insu buai a awm thin a ni. Zirna lamah hma kan sawn a, inelna te pawh a piang ve ta hial a, a lawmawm hle mai. Dik nia an in hriatnaah naupang lungawiloa an awm chuan a hma hun a chhe thei a, an dikna chanvo humhalh sak chu nu leh pa leh Board te kut a ni. Chutih rualin answer sheet en duh satliah in an bawh ve bawk a, hnathawktute tan thil buaithlak a ni thei a, kalphung a buai fo a nih pawhin thil awm a nihna chen a awm a. Chumi thliar nan chuan sum an hmang ta mai niin a lang a ni. Ennawn hnua mark hmuh zat a hma aia a tlem a nih pawha zirlai in a pawm a tur tih pawh hian complain lut tur thlifim in, a ti tak tak te chauh a huam theihna hmanrua niin a lang bawk a, ‘deterent’ atan an hmang ti ila a sual tam pui lo ang. Chuti chuan dan chuan mimal dikna a humhalh tur a ni a, intluk tlanna a kawk tur a ni bawk a ni. Tuna bye law hman mek hi a constitutional em? tih zawhna a piang thei a, dan thiamte’n bih nawn a tul an tih chuan zirlai leh Board thlirin a buk tawka a tha zawk siam ni mai tura ngaih a ni. ` Rethei te hi an rethei hle tawh a, kan ram a pachhe bawk si nen hma hun thlirtu nih a chakawm loh chang a tam ta mai. Zirlai nu leh pa engkim huama retheih pawisa lo, an fate tana inpe an awm a, chutih rualin chutiang ni lo pawn lam lang thei chauh ngaisang, zirnaa insen hreh viau laia thawmhnaw lei huai tak an awm bawk a, hrut rual pawp chi a ni lo ang. Naupang chungchanga midang an dawr danah thil tak tak duh an ni em? tih pawh zirlai hmakhua buaipui tura Sawrkarin a chhawr te hian hria se a va duhawm em. Chuti niloa dawr hrehawm an lo ni palh a nih chuan ‘rethei, pachhia te dinhmun hre lo khawpa nuamsa’ an ni tawh em ni? tiin zawhna a piang thei tlat a ni. Engpawh nise he thil thleng atang hian thil tha zawk, huamzaua inbuk tawk dan tesep ngaihtuah a tul niin a lang rum rum e.