Aizawl: Mizoram Scholarship Board chuan tunlai hian zirlaite account-ah tribal scholarship an thun mek a, ruahman anga a kaltluan chuan tun thla chhungin zirlaite account-ah thun zawh fel hman vek an beisei. Mizoram Scholarship Board thawktute hnen atanga ZALEN thudawn danin scholarship hi Apex Bank kaltlangin thun a ni a, nikum lama bank an dawr Induslnd Bank a sum tlem la awm nen a thun hna hi thawh mek a ni tih an sawi a. Tribal scholarship atan hian Ministry of Tribal Affairs-ah cheng vaibelchhe 50 dil niin Ministry lam hian la sanction loh vaibelchhe 11 vel an la nei a, hei hi sanction thuai a nih theih nan MizoramScholarship Board hotuten New Delhi-ah an bawhzui mek a, June chawlhkar hnihna velah chuan sanction hi tihfel hman beisei a ni.