Aizawl chhim lamah mi inhnuai luaha khawsa ve tawk tawk an ni; a nu leh pate thla khat lakluh a tlem. Matriculation result-a beisei ang mark hmu lote’n anwser sheet 1 endik nawntir nan Rs 1,000 an chawi chu sawi loh answer sheet 1 lakchhuah nan Rs 500 thehchhuah a nih pawhin an chhungkaw thla khat khawsak a buai dawn a. Subject 6 ennawnna senso Rs 6000 chawi phei chu ngaihtuah an ngam ngang lo; an khawsak a harsa em a ni! Nu hmangaihna zawng a lian em a, Dan pawhin a dang zo lo; a hringtu nu in Right to Information Act hmanga answer sheet lakchhuah dilna MBSE Appellete Athourity in a hnawlsaka, tawngkam dengkhawng tak tak a dawn te chu intih hnual tir duh lovin Mizoram Information Commission ah ‘ka tum nge ruh sa ruh’ tiin a tlu lut rawih a; a beisei phak tawng buain zirlai naupang dang sum harsat vanga answer sheet la chhuak theilo thei lote chuan RTI an lek thei ta. Zalen thu laknain a tarlan danin Class X MSBE in a buatsaih Matriculation Exam 2014-2015-a fanu answer sheet chu 14th May 2015 khan MBSE, SPIO hnenah Malsawmkimi chuan a dil a. 'SPIO chuan ka dilna chu pe phal lovin MBSE Notification No. MBSE/Ex(HS)8/2011 dt. 6.1.2012 anga paper pakhat zelah Rs. 500/- pe a dil turin (11.6.2015) min lo hrilh a, sum ah kan harsa si a, Departmental Appellate Authority ah 7.7.2015 ah ka fanu aiawhin appeal ka thehlut ta tawp a ni,’ tiin thulakna chuan a sawi bawk. MBSE Appellate Authority hotu chuan an harsatna te a ngaihtuah hnu-ah thuthlukna 24.7.2015 ah a siam niin thulakna chuan a tarlanga, ‘MBSE Rules angin zirlai naupangte chuan Rs. 500/- pe in an duh chuan an chhanna an dil chhuak thei ang' tih chu tlawhchhanah hman a ni bawk. Mizoram Information Commission ah ni 14.10.2015 ah appeal thehluh a ni leh a, Chief Information Commissioner chuan appeal chu ngaihtuahin High Court hrang hrang thuthlukna te, Central Information Commission thuthlukna te leh Supreme Court thuthlukna te nen enmilin, ni 8.2.2016 khan MBSE chu he naupang chhungte hi RTI dan (The Mizoram RTI Rules, 2010) ang a phek khat (A-4 or A-3 size paper) ah Re. 1 zel chawi a pe chhuak turin judgment a ti chhuak niin thulaknaah chuan tarlan a ni bawk.