ZALEN May 3, 2026: State Election Commissioner Dr. H.Lalthlangliana chuan, “Aizawl Municilpal Corporation (AMC) inthlan neih puan a nih hnuah khauh takin model code of conduct (MCC) kenkawh nghal a ni a, political party leh sawrkar pawhin an ngai pawimawh hle a. Sawrkar department hrang hrang atangin MCC ngaihhnathiam dilna 66 kan dawng a, heng zinga 10 tih loh chu kan remti vek,” a ti.

Dr. H.Lalthlangliana sawi danin sawrkar department zinga MCC bawhchhiaa advertisement chhuah pahnih an awm tih sawiin heng mite pawh hian an hnuk kir leh nghal tih a sawi a. Hei bakah hian MCC bawhchhiaa puhna dang paruk an dawng tih sawi bawkin a complaint-tute hi a finfiahna thehlut turin an hriattir a, direct evidence a nih loh avangin an pawm lo tih a sawi a. MCC bawhchhiatna chu court case ang hialin an kalpui tih sawi a, hetih lai hian inthlan chungchangah complaint an dawng lo tih sawiin lawmawm a tih thu a sawi bawk.

Inthlan thlirletna hunah political party hrang hrangte chuan Mizoram People’s Forum (MPF) hnathawh fakawm an tih thu sawiin hetih rual hian MPF-ah chuan party a nihna nei ang chi chu duty-tir loh tha an tih thu an sawi a. MLA roll-a hming chuang, AMC roll-a awm lo an awm nual tih sawiin fimkhur taka kalpui tha an tih thu an sawi a. Hei bakah hian chhungkaw khata chengho si, hmun inkar hlat deuh deuha serial number awm an awm chu tha lo an tih thu te, vote nei tho si, duty vanga hmun danga chhuak an tam chuan vote tla a tihchhiat phah nia an hriat thu an sawi bawk.

AMC inthlan a hun taka neih loh chhan chungchang chu sawi fiahin state election commissioner chuan, “AMC inthlan hi March 1 atanga ni 20, 2026 inkar chhung vela neih tur a ni a. Mahse, inthlana kan hman tur ballot box hi Lai Autonomous District Council (LADC) inthlanah khan hman a ni a, a bak kan nei daih lo a. Dan ang chuan inthlannaa hman EVM-te chu vote chhiar zawh atanga ni 60 chhung kawl that a ngai a, LADC-a kan hmante hi March 9, 2026 khan a hman theih (free) ta chiah a. Mahse, assembly session lai a nih avangin neih luih kha thil tih chi-ah kan ngai lo a, lo nei lui ta pawh ni ila hun dangah pawh assembly session nen an insu buai zel dawn tihna a ni a. Tuna kan inthlan hun angah hi chuan kan buai tawh lo turah kan ngai a, sawisel huamin a hun kan sawn a, tifuh pawh kan inti hle,” a ti bawk.