ZALEN April 30, 2026 : State Election Commissioner Dr. H. Lalthlangliana, MCS (Rtd) hovin vawiin khan MPF te, Political Party ai awhte leh MJA-te chuan AMC Inthlanpui 2026 chu thlirletna hun an hmang a, State Election Commissioner chuan inthlanna muanawm leh felfai tak kan neih theih avangin MPF-te, Political Party-te leh Media lama thawktu zawng zawngte chungah lawmthu a sawi a ni.

Vawiin thlirletna an neihah hian Aizawl Municipal Corporation Inthlanpui 2026 chu tluang taka zawh fel a ni a, State Election Commissioner, Mizoram chuan Model Code of Conduct (MCC) chu ta tawp ta a ni tih a puang.

He hunah hian tun tum AMC inthlana thil bik chhinchhiah te report a ni a, inthlan zawh takah khan Vote tamna ber Ward No. XVIII a tling K. Lalrodinga, ZPM chu vote hmu hnem ber niin vote 5899 a hmu a, K. Lalrodinga leh amah hnaih bertu Lalrina Renthlei, MNF inthlauhna chu inthlauhna tam ber niin 5899 - 3872 = vote 2028 a ni. Inthlauhna tlem berna Ward No. IX-ah B. Lalawmpuii, MNF chuan Zoramchhana, ZPM chu 3140 - 3022 = vote 118 in a hneh.

Tun tum AMC inthlanah khan candidate zawng zawng te kum chawhrual chu Kum 50 a ni a, Candidate tlingte kum chawhrual chu kum 49 a ni. Tling upa ber chu V.L. Zamlova, ZPM, kum 69 a ni a, naupang ber chu Christina Roluahpuii Sailo, ZPM, kum 31 mi a ni. Tun tumah hian mipa 10 an tling a, hmeichhia hi Reserve seat 6 bakah general a tling 3 nen mi 9 an tling.

AMC 2026-ah hian Corporator 19 zinga pali chiah ni lai an awm a, 15 te chu tling thar an ni. Mayor tur H. Lalremtluanga, Deputy Mayor tur R. Lalawmpuii leh Executive Corporator tur Christina Roluahpuii Sailo te hi an vawi hnih tlinna niin, B. Lalawmpuii, MNF hi vawi thum a tlinna a ni.

Corporator thlan thar zingah hian Matric pass lo an awm lo a, PU / Class XII pass chin 10 an awm a, Graduate chin hi mi pasarih an awm. Master degree nei pali an awm a, Doctorate degree nei pakhat a awm bawk.