DOWNLOAD OUR APP

Read latest news on your phone
app-store
McManaman-a'n UCL final khel tur atanga mi XI a thlan chuahah Real Madrid player 2 chiah an tel
May 27, 2022

Real Madrid leh Liverpool tana khel tawh Steve McManaman chuan, Champions League final khel tur Liverpool leh Real Madrid te atangin a duh thusam team khat a rem khawm a, Real player pahnih chiah an lang phak. McManaman hi 2000 Champions League final, Stade de France-a khelhah khan Real Madrid tana inlanin Valencia lamah goal a thun nghe nghe. 

McManaman hian, YouTube channel Betway hnenah team hnih atangin a player duh XI a thlang chhuak a, 4-3-3 formation hmanga a rem chhuah zingah Real Madrid player pahnih chiah an lang phak a, a line-up zingah hian Thiago Alcantara a thlan loh laiin Luka Modric a thlang chhuak hlauh thun. McManaman chuan,"Thibaut Courtois hian season duhawm tak a hmanga, mahse vanduaithlak takin Alisson hi ka team-a goal veng tur chuan ka duh zawk a ni" a ti.

England international hlui McManaman-a'n defence pali a thlan chhuah zingah Madrid player tan hmun a awm lova, Liverpool player pali thlang chhuakin Trent Alexander-Arnold chu left-back turin a duh ber a, a laiah Virgil Van Dijk leh Ibrahima Konate inkawp tirin Andrew Robertson chu right-back turin a thlang chhuak bawk. 

A hmatawng leh defence a thlan chhuah zingah sawisel tur an awm em em loh laiin McManaman-a midfielder thlan chhuah te hi chuan mi tam tak duhthu a sam chiah lo mai thei.  McManaman chuan,"Real Madrid chakna hnar pakhat Luka Modric hi Real player pahnih zinga ka thla chhuah pakhat zawk chu a ni a, defensive midfielder zinga ka duh ber Fabinho pawh ka telh lo thei lo. Anni pahnih bakah hian Jordan Henderson hi a duhthlan leh chu a ni, Luka Modric kan neih phawt chuan Thiago kan mamawh lovang," a ti. 

A hmatawng tura a thlan chhuah te hi chu an awm veng vawng hlawm hle a, Sadio Mane, Karim Benzema leh Mohamed Salah te a thlang chhuak a ni. McManaman chuan,"Vinicius Junior ka thlang lo hi a vanduai hle a, a aiah Sadio Mane ka thlan zawk hian chhan a nei a, chu chu tunlai a khelh that piah lamah African Cup of Nations-ah ropui takin a inlan bakah World Cup khel turin Senegal a tlinpui thei bawk a, thlan awm tak a ni," a ti. Benzema chungchang pawh sawi langin,"Karim hian a season duhawm ber a hmang mek a, tunlai chu a ball tawh apiang hi rangkachak-ah a chang zel thei emaw tih mai tur a ni," tiin Benzema khelh that thin zia a sawi. 

McManaman-a team thlan chhuah te chu: Alisson; Alexander-Arnold; Van Dijk, Konate, Robertson; Modric, Fabinho, Henderson; Mane, Benzema leh Salah te an ni.

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh