Aizawl: Health & Family Welfare Minister Lal Thanzara chuan Zirtawpni khan Mizoram College of Nursing (MCON) Falkawn Hostel Building sak thar a hawng. Hawnna thu a sawiah Health Minister chuan, “Mizoram atanga nurse zirchhuak tha tak tak kan neih te chuan ram pawna an thawhna ah pawh Mizo hming an ti tha thin a ni,” a ti a. Mizoram atanga nursing zirchhuak te tan ram chhungah leh ram pawnah hnathawh tur a inhawn zelna turin sawrkarin hma a lak mek thu a sawi bawk. Lal Thanzara chuan Mizoram Health sector-in hma nasa taka a sawn thu sawiin Siaha, Serchhip, Champhai, Mamit, Lungleiah te Eye Ward leh Operation Theatre sak zawh tawh a nih bakah Integrated Ayush Hospital Thenzawl ah hawn tawh niin, Dental OPD Building Kolasib, Serchhip, Mamit leh Champhaiah te sak zawh tawh a ni, a ti a. Aizawl Civil Hospital ah pawh tunhnaiah Dental Ward hawn thar niin cabin hawn belh anih thu leh Digital Xray machine te pawh an neih thar thu a sawi bawk. Khual Zahawm Lt.Col (rtd.) Z.S Zuala pawhin thusawiin Aizawl Civil Hospital chu India rama Civil Hospital-ah chuan a faiber pawl a nih avangin chhuanawm a tih thu a sawi a. Nurse te chu an damlo enkawlte damna an kutah thui tak a innghat ani tiin hmangaihna leh lainatna nen damlote enkawl thin turin MCON a nurse zirlaite a chah a ni. Cheng nuai 1119.64 senga sak hostel building hi Block I leh Block II-a then hran a ni a. Block I hi 1413.84 sqm a zau niin, Block II hi 1372.65 sqm a zau a ni a. Chhawng 5 ve ve niin a pumpuiah zirlai room tur 80 awmin khum 160 leng tura ruahman a ni. MCON hi kum 1980 khan din niin tun dinhmunah B.Sc Nursing zirlai 118 an nei a ni. MCON Hostel Building hawnna inkhawm hman zawhah hian Health Minister leh mi pawimawhte hian State Referral Hospital Falkawn chu tlawhin a hmunah an mamawhte leh hmalakna te an enfiah nghal a ni.