ZALEN Feb 18, 2026: Mizoram Public Service Commission (MPSC)-in Mizoram Civil Services (combined competitive) examination - 2025 final result February ni 9, 2026-a a tih chhuahah candidate pakhat technical ground-a tling lo hmuhchhuah a nih thu leh result ennawn anih tur thu a puan hnuin nimin khan result siam that a ti chhuak.

MPSC-in MCS (Combined Competitive) examination, 2025 final result siam thatah hian February ni 9, 2026-a a tih chhuah a 13-na ni a, MCS atana tling, Samuel Chinsonmung, Vengnuam, New Lamka, Manipur chu result tharah hian paih a ni a. 

Result hluia 14-na nia MCS atana tling chu 13-na ah chhovin, MCS atana tling tho, 15-na chu 14-na ah a chho a. MFAS atana tling 16-na Z. Lalnghaktluanga, Zotlang, Aizawl chu result tharah hian 15-na ah chhovin, MCS atan a tling thar bawk a. 21-na ni a MIS atana tling, GS Zoremtluangi, Electric veng, Khawzawl chu 20-na ah chhovin MFAS atan a tling ta thung bawk.

Result hlui a, panel list hrang hrang zinga mark hmu sang ber - MIS panel list-a pakhatna, Lalremsiami, Armed Veng, Aizawl chu result tharah hian 29 na niin, MIS-ah a tling chho thung a ni.

#ZalenNews