Aizawl: Mizoram Public Service Commission kaltlanga Mizoram Civil Service (MCS) Officer 8 leh Mizoram Information Service (MIS) officer 5 lak thar tuna Administrative Training Institute (ATI)-ah Foundation Course kal mek te chuan Chief Minister Lal Thanhawla chu a Office ah an hmu a, Chief Minister hian officer thar te fuihin an kal zelna turah duhsakna a hlan. Chief Minister Lal Thanhawla chuan Mizoramah chuan sorkar hnathawk a bik takin officer hna phei chu vohbik (privileged class) nia ngaih theih a nih thu sawiin sawrkar hnathawk te lakah mipuite beiseina a sang chho zel a, chu an beiseina tihhlawhtlin nan sawrkar hnathawkten mawhphurhna leh tihtur an nei ani tih hriaa an hna kaltlanga Mizoram leh mipuite tan theihtawp chhuah turia a beisei thu a sawi. CM chuan officer thar te chu politically neutral ni tur leh sawrkar siamtu a rinawm nilovin sawrkarah rinawm taka thawk turin a chah a. An mawhphurhna a san thu sawiin langtlang tak leh mawh la ngam chunga hna thawh a ngai tih sawiin rinawmna leh taimakna nena an thawh phawta theihtawp an chhuah chuan Prime Minister’s Excellence Award in Public Adminstration ang chawimawina te pawh an dawng thei niin a sawi bawk. Chief Minister chuan Mizorama tlawmngai pawl hrang hrangte leh sawrkar thawhhona a that thu sawiin hengte hi hriaa tlawmngai pawlte nen thawhhona tha neih a pawimawh niin a sawi. Chief Minister chuan tunlai khawvelah Mizote zingah social media kan uar chho zel tih sawiin hengte hi kan hmangsual em tih te chhuta, a ni lo zawnga hman loh inzirtir leh thil tangkai a nih dan inzirtir te hi a bik takin MIS officer te tan chona lian tak anih thu a sawi bawk. Officer thar te chu Mizoram development hnuk (backbone) tak tak a nih dawn thusawiin hawihawm takin an thawhna hmun apiangah mipui leh ram rawngbawl hna thawk turin a hrilh bawk. MCS bik tan Training dan tidanglamin kumin atangin kum khat chhung an training tawh  dawn a ni.