Aizawl: Chief Minister Lal Thanhawla chuan MCS training mekte chu thudika ding ngam tur te, hlemhletna leh eirukna laka fihlim tur ten a fuih. Zirtawpni tlai khan Mizoram Civil Service (MCS) probationer te hian Chief Minister Lal Thanhawla chu a pisa ah an hmu a. CM chuan MCS training mek te chu an kovah mawhphurhna lian tak a innghat nghal tih hre turin a chah a. Sawrkar hnathawk tam tak zingah neitu rilru pu lova hlawhfa rilru pu, tlemte thawka tam tak lakluh tum an tam avangin kuttlinglova sum lak luh pawi tihlohna an nei thin niin a sawi a. MCS te chu an laka mipuiin beiseina sang tak an neih hlenchhuak turte, mipui mimir hawihawm taka dawr thin tur te, an nungchang, inchei dan, ei leh in leh nun dan uluk turin a fuih bawk. Chief Minister chuan Administrative Reforms Commission 2na in rawtna a siam zingah sawrkar hnathawk ten an thawh that dan a zira kaisan ‘performance link promotion’ chungchang pawh sawrkar hian a ngai pawimawh tawlh tawlh dawn tih a sawi bawk MCS probationers-te hi mi 15 niin ATI Director Ramdinliani leh Jt.Director Angela Zothanpuiite’n an hova. Chief Minister hi Principal Secretary to CM Lalram Thanga leh Principal Adviser to CM R.L.Rinawma te’n an tawiawm a ni.