Aizawl May 16, 2023 : Mizoram Cooperative Society Tangrual Pawl chuan Mizoram Cooperative Society Act Section 53 hnuaia Provisio - Cooperative Society hruaituten kum 10 aia rei hruaitu nihna an chelh theih lohna dan paih tura thutlukna an siam tawh Mizoram Cooperative Society Siamtha Pawl (MCSP) ten Press Release siama thu dik lo a nih thu an tarlan chu an hriat chian loh vang, an ti a. Ngaihdam an dil tawh tih an sawi.

Mizoram Cooperative Society Tangrual Pawl chuan thu dik hre lo a, Press Release an siam avang hian 13.5.2023 khan MCSP hi Legal Notice an pe tih an sawi a, an thusawi a dik loh zia nemnghehna atan pawh Mizoram State Level Cooperative Society te minute pawh pek tel a nih thu an sawi a, Legal Notice pek an nih hnu hian MCSP chuan ngaihdam dilna an tichhuak leh tawh tih an sawi bawk.

Mizoram Cooperative Society Tangrual Pawl Chairman T. Lalmuanpuii chuan 2016-a State level Society ten an thu rel tawh an lo hriat tawh loh avanga MCSP ten Press Release an siam chu, thu dik an hriat leh hnua ngaihdam an dil chu anmahni pawh Coorporator ve tho an nih avangin a ngaihdam thu a sawi.

T.Lalmuanpuii chuan Mizoram Cooperative Society Act Section 53 hnuaia Provisio - Cooperative Society hruaituten kum 10 aia rei hruaitu nihna an chelh theih lohna dan chu paih a nih theihna turin Chief Minister Zoramthanga thurawn angin Society ten seal leh signature campaign an kalpui chu a hlawhtlin ngei theihna turin hma an la zel tih a sawi a, Ningani-a Council of Minister thutkhawmah he dan hi an paihsak ngei a beisei thu a sawi bawk.

Mizoram Cooperative Society Tangrual Pawl  ten nimina chanchinthar lakhawmtute an kawmnaah hian Federation hrang hrang hruaitute an kal tha hle.