ZALEN Oct. 22, 2024; Mizoram Commercial Vehicle Union (MCVU) ten nawrh huaihawt an tum chu ni khat (1), October ni 23, 2024 (Nilaini) chhung chauh kalpui a ni dawn tih an puang.

Vawiin chawhnu dar 2 khan MCVU hruaituten Aizawl press club-ah thuthar thehdarhtute kawmin he thu hi an sawi a, nawrh huaihawt an tum chu tiam chin awm lo a kalpui tum ni mah se, kohhran thenkhat inkhawmpui lian nei tur leh Central YMA rorel inkhawm neih tur vanga ngenna an dawn vangin ni khat (1) chauh an kalpui dawn ta niin an sawi.

Kawngpui chhia leh oil man tihniam tura sawrkar an ngenna-ah awmzia a neih loh avangin nawrh an huaihawt dawn tih an sawi a, naktuk zing dar 6 atanga tlai dar 6 an ding dawn tih an sawi.

Oil man to hian lirtheia eizawngte chauh a nghawng lo a, chhungkaw tin min nghawng niin an sawi a. "Oil man a to chuan bungraw phurh man a sang lo thei lo a, in sakna bungrua leh ei leh bar phurh man a sang dawn. Hemi ngaihtuah chunga lungawi lohna lan lantir kan ni tih min hriatpui a, min thlawp turin mipuite kan ngen a ni," an ti bawk.