Aizawl: AH & Vety department hotute chuan mipuiin sa hrisel zawk an ei theih nan Modern Meat Shop-a sa zawrhte chu lei tam zual se an duh thu an sawi. Tun hnaia bawngsa zawrh thianghlim loh avanga a zuartu man a nih chungchangah AH & Vety department hotute chuan sa thianghlim lo mipuiten an ei fo an rin thu an sawi a, tun hnaia sa thianghlim lo an man sak tak pawh Vety deptt. hnuaia bawng talhna hmuna talh a nih an rin loh thu an sawi. Zalen zawhna chhangin AH & vety department hotute chuan bazar-a sa zawrh chu endik an duh viau thin rualin thawktu indaih loh avangin an endik vek theih loh thin thu an sawi a. Mipuite'n sa thianghlim leh hrisel ngei lei thin se an duh rualin an hnuai sa talhna hmuna talh vek theih a nih loh avang leh endik hna an thawh theih loh avangin bazar-ah sa thianghlim lo zawrh a nih fo thin thu an sawi. AH&Vety Joint Director Dr. K. Rokhawla chuan Mualpui-a sa talhna hmun chu a lun chhoh zel thu sawiin, sa talhna hmuna sa talh te chu post mortem vek an nih hnu chauh ah zawrh chhuah tura lak chhuah thin a nih thu a sawi a. Mualpui ah chuah sa talhna hmun a awm vangin Aizawl khawpui chhunga sa zuar ten an ring vek thei lo chu pawi an tih thu a sawi a, Bawngkawn brigade rama sa talhna hmun an buatsaih mek chu hman theih a nih hun chuan sa zuar tuten an tangkaipui zual a rin thu a sawi bawk. Dr. K. Rokhawla chuan mipui ten sa thianghlim an ei theih nan Vety Doctor ten a hrisel ngei a ni tih an enfiah hnu chauha an zawrh chhuah chu mipuiten lei na chang hre leh zual se an duh tih kan palai a hrilh a. Modern Meat Shop-a sa zawrh chhuah chu a thianghlim ngei a ni tih huai taka an sawi ngam thu sawiin, an hnuaia sa zawrhna hmun a mi a thianghlim loh avanga sa lei tuten harsatna an tawrhah mawh an lak ngam thu a sawi bawk.