ZALEN, Mar. 24, 2025: Goa-a veteran tana buatsaih, Yonex-Sunrise 47th Indian Masters (Veteran) National Badminton Championship 2025-ah Mizoram shuttler-te chuan medal pali an la a. A hmaa pahnih an lak tawh belchhahin Pathianni khan silver leh bronze pakhat ve ve a lak belh leh.

March 16, 2025 atanga Patna-a inelna tanah hi Pathianni khan khelh zawh niin a hmain Lalmuanawma, Hlimenin 45+ Men’s Singles-ah silver lain 40+ Women’s Doubles-ah Lalduhzuali, Durtlang leh Ponty Lalramtluangi, Chaltlang ten bronze an lo lak tawh chu Lalbiakliana, Saron Vengin 65+ Men’s Singles-ah silver leh K. Ramzauva, Khatla Vengin 60+ Men’s Singles-ah bronze an lak belh leh a ni.

Biaka hian round of 64 atangin inelna hmachhawn tanin Ashok Badhe chu 21-6, 21-7-in a hneh. Round of 32-ah Seeded No. 3 Ashwani Kumar chu straight set (21-19, 21-17) bawkin a hneh leh a. Round of 16-ah pawh harsatna tawk lovin a tumpui, Johnson M.F. a inhliam hlauh avangin a thiam pariatah a inhlang kai.

Quarter final-ah Deepak Srivastava chu straight set bawkin, 21-16, 21-11-in a hneh a, semifinal-ah Seeded No. 2 Anupam Kumaria chu 21-17, 21-18-a hnehin final a lut.

Final-a Biaka’n a hmachhawn hi amah ang tho a seeded ni pha lo, Basant Kumar Soni a ni a; mahse, straight set (21-9, 21-17)-in a hneh ta lo a, silver medal a la ta a ni.

60+ Men’s Singles-ah Rz-a erawh Seeded No. 3 ni phak a ni a, round of 64-ah Manish Patel chu 21-18, 21-12-in a hneh nghal a. Round of 32-ah Dinesh Kapoor lakah awlsam lehzualin 21-5, 21-9-in a chak leh a. Round of 16-ah pawh harsatna nei loin Ramesh Sharma chu 21-13, 21-16-in a paltlang leh bawk.

Quarter final-ah Ajay Kumar Sanga nen intumin straight set (21-8, 21-12) bawkin awlsam takin a paltlang leh a. Semifinal-ah Murthy AVS nen intumin game hmasa ber la hmasa mah se a dawtah a hloh zawkah a tang a. Deciding game khelh ngaiah pawh inhnehtawk tak ni mah se a tawpah 21-16, 18-21, 17-21-in tlawm zawkah a tang a, bronze medal a dawn a ngai ta a ni.

Goa-a inelnaa maltan bika semifinal lut chinte hi September thlaa Pattaya, Thailand-a Badminton World Federation (BWF) World Senior Championship-ah India aiawh tur an ni nghal a, Biaka leh Rza hi an tel dawn a. A hmain Muanawma chu 45+ Men’s Singles-ah India aiawh turin a lo invaw tling tawh bawk.

Mizoram Badminton Association (MBA) chuan Mizoram tihmingthatu a player-te a chhuangin a lawmpui a. Tournament an hmachhawn leh turah pawh duhsakna sang a hlan.