ZALEN, October 14, 2025: Lalhmangaihzuala leh Lalnunsanga te chuan National Ju-Jitsu Championship 2025-ah Mizoram tan gold medal pahnih leh silver medal pakhat hlawh chhuakin world championship khel turin an tling nghal bawk.

Kar kal ta Ningani atanga Saharanpur, Uttar Pradesh-a National Ju-Jitsu Championship-ah hian Ju-Jitsu Association of Mizoram (JAM)-in Mizoram aiawh turin fighter pahnih a tirhte hi an hlawhtling hle a, Sangsanga’n gold leh silver medal lain Hmangaiha’n gold medal a la bawk.

Chawnpui Veng, Aizawl tlangval, Sangsanga hi adult male 69 kg-a Contact Jiu-Jitsu (MMA rules)-ah gold medal a la a, Ne-Waza (BJJ)-ah round of 16 atanga bul tanin final a lut a, final-ah chak zo lo hlauhvin silver medal pakhat a la.

Republic Veng, Aizawl tlangval, Hmangaiha hi category pakhat, Contact Jiu-Jitsu (MMA rules)-ah adult male 62 kg division-ah inlanin round of 16 bul tanin final thlengin a chak a, gold medal a la bawk.

Thawhlehnia zawh tak, Uttar Pradesh-a inelna hi world championship-a inlan phak tur zawnna a ni nghal a, gold medal an lak ve ve avangin Mizo tlangval pahnih hi khawvel huap inelnaah an inlan zui thei dawn a ni.

Ju-Jitsu hi Indian sports ministry-in a pawm, university games leh Asian Games-ah tel a nih avangin India-ah hian miin an bawh nasain a lar chak hle a. Vohbik (para athlete) leh kum upa lam kum 60 thleng (masters) khelh theihna huang a awm bakah tel theihna pawh chi hrang hrang – Ne-Waza, Fighting system, Contact system leh self-defence demonstration te a awm a ni.

Mizoramah erawh Ju-Jitsu hi sorkarin a pawm a la ni chiah lo va; mahse, JAM hruaituten tan lain theihna nei tha thalaite tan sum an thawh bakah sponsor-te zawngin an a khel thinte an chawi kang mek zel.

President Rothuamliana chuan fighter-te taimakna leh an coach te inpekna chuan hlawhtlinna a thlen thu sawiin mi pahnih chauh intir thei hrih mah se medal pathum lai an rawn hawn avang hian Mizote khelh chi tak a nihzia a tar lan thu a sawi. 

President leh Secretary C. Lalrinpuia te chuan sorkarin theihtawpa hma a lakpuia Mizoram State Sports Council (MSSC) pawhin a pawm ve thuai an beisei thu a sawi.