Mizoram sawrkarin Medical College  din tuma hma  a lak mêk?puitlin hun tur hi beiseinain kan thlir thuap a. Chu College,  Mizoram Institute of Medical Education and Research tih chu enkawl turin Director atan Dr. Lallukhum Fimate, RIMS, Imphal Director hna atanga pension tawh lak a ni a. Ani aia  tawnhriat nei tha zawk lak tur hi an awm bik awm lo ve. Kan thenawm state te’n hetiang College hi an neih sup sup tawh avangin a hnukhawia kan tan reng hi a dik bik lo va; chuvangin, sawrkar hmalakna hi tlai khawhnu angin lang mah se, a la tlai lutuk lo ve. Chutih lai erawh chuan hna khirh leh harsa tak tak pal tlang ngai a awm avangin mipuite’n kan nghahhlelh ang leh duh anga rangin a din theih mai dawn loh va. Chuvangin, dawhthei taka kan nghah pawh a tul dawn a ni. A buaithlak zualna chu he Medical College hi central sawrkar ta ni lova Mizoram sawrkar ta a nih dawn avangin sawrkar laipui kan pûr thei vak dawn lo va; chuvangin, kan state sum a heh ham ham hle dawn a. Central sawrkar min rawn dinsak Vety College emaw, Horti College emaw, a nih loh leh Central University MZU nei tura harsatna neuh neuh kan sutlang thin ang ngawt kha a ni dawn lo a ni. State Medical college neih tum meuh chu a kalkawng a thuiin a  khal talh talh viau ang. Chuvangin, state sawrkar leh mipui kan tanrual viau pawh a ngai awm e. Chutianga thil hautak chu engnge din a tulna kher? Kan thenawm state-te kan elna a nih mai bakah health care lama kan mamawh min phuhrûktu a nih theih dawn vang a ni. Kan Mizo thalaite’n ram danga medicine zir nana sum tak sênga an kal a ngai tawh lo vang a, (a duh leh thei chu an kal thei tho ang a), Under-Graduate leh Post-Graduate course te kan neih ve theih tawh dawn avangin  MBBS leh a chunglam zir tura Mizoram chhuahsan zirlai an  tlem hle tawh ang. Doctor hna nei lo tam tak te hian Teaching leh Clinical lamah hna an hmu tawh bawk dawn a ni. Chu baka pawimawh deuh mai chu he College hian hospital, Teaching Hospital an tih mai lian tawk tak a keng tel bawk dawn a. Chutah chuan Doctor tam tak leh Nurse leh para-medical te nen 1000 chuang rual zetin hna an thawk ang a,  Under-Graduate zirlai leh PG student te’n he Hospital hi inzir nan an hmang chur chur mai dawn a ni. Thiamna chungchuang bik speciality leh super-speciality thlenga kan neih te pawh kan beisei thei ang.  Chutianga Hospital leh College changkang chu kan neih chuan a zâr zotu tur chu mipuite bawk kan ni dawn a. Tin, he Hospitalah hian Doctor ten research nasa takin an bei ang a, natna leh a kaihhnawih hrang hrang tihdamna tun hmaa la hriat lohte pawh an hmu chhuak thei dawn a ni. A va tha dawn si êm! Medical College din turin engnge kan mamawh ang? Hei hi thil hriat châkawm tak a ni. India rama Medical Education chungchanga thuneitu ber chu Medical Council of India kum 1934-a din hi a ni a (He Council hi National Medical Council ti-a thlak a ni tawh awm e). He Council-in dan a siam regulations hrang hrang te chu Medical college din tur leh ding laite pawhin an zawm ngei tur a ni. Kum 1999 regulations leh a hnu-a an belh zel te hi a chipchiarin a sei hle mai a; chuvangin, a tlangpui chauh lo thlir thuak thuak ila. A hmasa berin Medical College chuan Campus lian tak 25 acres  aia tê lo an nei ngei tur a ni. Hei hi khawpui lian mihring nuai 25 aia tam awmna hmun leh tlangram atan chuan Campus pahnih 10km aia inhlat lova neih theih a ni. Under-Graduate course-ah hian seat 100 aia tlem lo a  awm ang a, department 21 zet, entir nan-Biochemistry, Pathology (with Blood Bank), Human Anatomy, Pharmacology, Medicine, leh a dang kan hriat lar tak tak te an awm dawn a ni. Department tinah hian Professor leh a puitu doctor 10 aia tlem lo zel an awm bawk ang. Administrative Block 36sqm aia zim lo te, ran in (animal house) te, Auditorium, Day Care Centre leh a tul dang tam tak  awm turin regulation hian a tuk bawk a. Central Library,  lecture theatre pathum zirlai 250 leh 120 len theihna te, (hei hi classroom pangngai baka mamawh niin a lang) a nei tur a ni a. Hetih lai hian department tinin mamawh bik an nei theuh va. Entir nan, Anatomy Department chuan lecture theatre lian tawk tak, Demonstration Room, Dissection Hall, Histology  Laboratory, research laboratory, Museum, Library, Staff Accomodation, a zau zawng bithliah thlap nen a mamawh a. Entir nan Professor leh HOD chenna atan chuan quarter 30sqm aia zim lo a ni tih thlengin a chipchiar a ni. Hei hi department pakhat chauh mamawh a nih chuan Department 21 in an mamawh belh khawm chu namai lo tak a ni dawn a ni. Tin, Medical College din dilna thehluh laiin khum 300 an nei tur a ni a, hei hi second renewal thlengin a pawm theih ang a. Third renewal-ah erawh chuan khum 500 a tling tur a ni tih a ni. Hei hi a hnuah ennnawn lehin khum zat hi 470-ah an tihniam leh a. An duhtui takzet a ni. Khing zawng zawng kan thlir chuan Mizoram sawrkarin Medical College din an tum chu a rawng pawh an la chah lo a tih theih awm e. Teaching Hospital atana duan mek State Referral Hospitala Doctor  Nurse leh paramedical (Non-technical Staff telin) awm lai 227 te hi an la bei tham hle a (tun hnaiah Staff Nurse 25 an dah belh a). Tunah hian Doctor, Nurse leh technical Staff tam tak lak belh tura hmalak mek niin a lang. Medical College din tirha SRH-a khum awm zat tura MCI in a tuk 300 zat hi nei thei turin Sawrkarin February 02, 2016 khan thupuan a chhuah tawh a. A hma khan khum 50 nei tawhah lo ngai ila 250 dang dah belh a  la ngai dawn a ni. Khum dah belh tur chuan building sak belh emaw, a awm sa tihlen emaw a lo ngai ang a.  Campus leh Hospital chu nei saah lo inngai ta pawh ni ila,  thuam belh a la ngaiin,  building tam tak sak belh teuh a la ngai dawn a ni.  ICU/ICCU,  Laboratory tam fe leh operation theatre changkang tak tak kan la mamawh dawn bawk. Sum mamawhna  a zual zel dawn a ni.  Mahse zu pawh um rei apiang a thlum an tih angin thil tha hi chuan a than hun chhung gestation period hi a duh rei thin a, dawhtheih leh nghah peih chu kan thupui a ni dawn a ni.Ka tawnhriat tlem tê: Manipur sawrkara ka thawh laiin Medical College a ding fel hman a. A bul tantu-ah chuan ka tang lo va, a hnu lamah erawh chuan CS ni chunga Health Department enkawl hna ka kawp tel avangin mawhphurhna ka nei ve ta  a ni. July 14th 2010 khan MCI chuan MBBS course  seat 100 tan  letter of permission a pe tawh a, April  17th 2015 khan phalna puitling recognition chu a pe ta bawk. Hetih lai (2010) hian  Teaching Hospital, JN Hospital khan khum 300 an lo nei hman tawh a ni. Tunah hian Under-graduate course-ah subject 21 bakah PG Course-ah subject 13 an nei mek bawk. Doctor chi hrang hrang, Casualty -18, Professor 31 Asso. Professor 43, Asst Professors 43, Sr Residents 78, Tutor 34 an vaiin 218 an thawk mek a, Non-technical staff chu 945 an tling bawk. JNIM College leh Hospital, campus atana ram 49 acres zet nei hi a la famkim bik lo va.  Khum 40 awmna tur Accident & Trauma Centre leh Professors’ Apartment leh Doctor Hostel mi 150 awm theihna tur sak mek a ni bawk. Manipur hian kum 1986 atang khan State Hospital pakhat Jawaharlal Nehru Hospital a nei a. He Hospital hi a hming thar phuahin Jawaharlal Nehru Institute of Medical Sciences (JNIMS) tih a ni ta. Medical College dinna rilru pu reng chungin  kum 2007 daih tawh khan he Hospital hi Society-a letin CM chu Chairman a ni nghal a. Chutih lai chuan he Hospital hi khum 100 chauh awmna a ni a, hospital lian tak a la ni lo. Vawiinah erawh chuan Medical College behchhan hospital a nih tawh avangin khum 600 chuang a nei tawh a, chuta 541 chu doctor te inzirna bik teaching beds an ni. MCI duh dan tipuitling tura chet ran kha  a har viau mai a. Kan Chairman CM lah khan mutmawh hnar mawha neihin Director leh Engineer ho kha a tur vut vut mai bawk a. Meeting-naah te pawh, “MCI thil duh tun thlenga kan la tihlawhtling thei lo hi ka ngaihtuah a, nizanah ka mu lo,” a han tih phei chuan sawi zui tur kan vân hle thin. Delhi-a a zin haw te hi mahni in pawh lut hmasa lovin Campus work-site lamah te hian a kal leh luah luah mai thin a, zahawm tak a ni. MCI lah kha mi hrilh lawk lem lova rawn endik thut thut thei reng kha an ni bawk si a. Canteen leh toilet thlengin an endik peih a, ninawm tak a ni. Engpawhnise, MIMER din tura state sawrkar hmalakna hi puitling ngei se, party politics khelh nan hmang lo ila kan duh vek a. Chutih lai erawh chuan  hmabak a la ko hle a, hun leh tha  sen a la tam chho dawn chauh a ni tih erawh chu kan hriat  a tha awm e. Duhthusamah chuan College hi Society-a leh (incorporate) ni sela; tichuan, Director leh a thawhpuiten zalen deuh leh chak zawkin hma an la theiin a rinawm. Mahni Medical College ngei kan neih hun hi Tlumtea thlirin kan thlir a ni e.