Tunhnai khan Zoram Mega Food Park, (MFP) Khamrang ami chu Central Food Processing Minister Harsimrat Kaur Badal chuan video conferencing in a hawng a. Thlai leh thei sawngbawl lam buaipuitute tan hna tam tak a siam theih dawn avangin hlawkna hmu tur pawh a sing tel an nih thu a sawi a. Doner Minister pawhin MFP din a ni chu Doner lam pawh an lawm hle thu a sawi bawk a ni.

MFP ah hian Core Processing Centre leh Primary Processing Centre a awm dawn a, mi sang 5,000 (direct leh indirect) tan hna a pe thei dawn nia ngaih a ni a. Kut-hnawthawktute bakah thei leh thlai sawngbawlna lam buaipuitute leh mipui lamin an hlawkpui tura beisei niin mi 25,000 laiin an hlawkpui beisei a ni bawk. Kum khat chhunga sum che vel ringawt pawh vaibelchhe 450-500 vel zet a nih rin a ni.

Kan ramah hian Central/state sum tam tak hmangin thil lian tham din a awm nual tawh a, mi tam takin hlawkna an tel tura beisei a nih laiin beisei a pha lo fo thin a. Hei mai hi niloin thenkhat chu awmze nei mang loa chhuak tate pawh a awm thin a. Thil thar lian tham din a nih hian mipui rilruah a tleu zawngin a dawnsawn tir fo thin a ni.

Mizoramin thlai leh thei sawngbawlna hmun thar tha tak mai kan nei ta hi thil lawmawm a ni a, a hlawhtlin theihna tura tha leh thiamna sengtute pawh lawmpui tur an ni ang. Zoram Mega Ford Park hi mimal hmalakna ni mah se, sawrkar lamin sum tam tak a seng tawh a, ram zau tak awhin vaiblechhe 75.20 zet a hmunhma dinna atan hman a ni tawh a, khawl tha tak tak bunna atan sum tam tak sen a ni tawh bawk a ni. A dintute tan chauh nilo mipui tam tam takin a hlawkna an tel theih dawn avangin ram ro tling ni thei a ni a, a hlawhtlin theihna turin nasa taka hmalak a ngai dawn a ni. A hmunhma peihfel tawh a ni a, khawl te pawh bun fel tawh niin tunah chuan thawktu lam pawhin hma an la tan thei der tawh a, hmabak erawh a la tam hle a ni.

Eng pawh nise Mega Food Park hi mimal hmalakna ni mahse sawrkar sum tam tak senna a nih avangin mi tam thei ang berin hlawkna an tel theihna turin thi leh thau pawlh tak meuha beih a ngai dawn tih a lang a. Mipui lamin an thlir thuap tawh dawn a, thlai leh thei sawngbawlna lamah Mizoram bung thara kaipuitu ni mawlh rawh se.