Meghalaya-a chanchinbumite intawh khawmna, Meghalaya Media Meet-ah a state chief minister, Conrad Sangma-a’n chanchinbua lo thawk rei tawh leh thawhhlawk mi pariat a chawimawi zingah Mizo nu, Linda Chhakchhuak a tel ve.

Chief minister-in a vawi khat nana Meghalaya Media Meet-a chawimawina a hlante hi kum 30 chuang chanchinbu khawvela lo inhmang tawhte an ni a. Chief Minister’s Special Grant atangin Rs. nuai 1 theuh hlan an ni.

Linda Chhakchhuak hi Shillong-a mi niin kum 1995 atanga tihchhuah, Grassroots Options dintu pakhat zawk leh publisher a ni a. He chanchinbu hi mihring, khuarel (environment) leh hmasawnna lam bik thlur ziakna a ni a, India hmarchhakah chuan hetiang kaihhnawih chanchinbu hmasa ber a ni nghe nghe.

Anmahni tihchhuah chanchinbu bakah hian kum 1993 atang tawh khan India ram chanchinbu lian leh news website eng emaw zatah a lo thawkin thu a lo ziak tawh a, Mizoramah pawh a hna avang hian hun eng emaw chen a lo awm tawh.

Chanchinbu khawvel piah lamah History & Social Anthropology lama thiamna nei a ni a, pawl hrang hrang leh mihring dikna chanvo humhalhna kawngah a inhmangin tha a thawh hnem hle bawk.

Meghalaya Media Meet hi an vawi khat hmanna niin ‘Redefining Journalism in the Digital Age’ tih chu thupuiah an hmang a ni.