ZALEN, November 10, 2025: An khelh hmasak bera Nagaland laka an chak hnuah Mizo tlangvalte chuan Men’s U-23 State A Trophy Plate Group-a an khelh vawi hnihnaah captain Johan Lalbiakkima half century vuak chhuah hmangin Sikkim lakah wicket ngain hnehna an chang leh.

Thawhlehnia Ropar Cricket Ground, Ropar, Punjab-a inkhelah hian thum vawrah chakin Mizoram hian vawm hmasak an thlang a, Sikkim batter-ten Mizo bowler-te ball vawm vaw hlei thei lo va, over 41-ah run 134 chauh siamin an thi zo.

Mizoram tan hian Nagaland batter-te pawhin an lo ngam loh tawh, Thuampui tlangval, Sahil Sharma chuan over 10 a vawmah run 19 chauh vuah chhuahsakin pahnih a vawm hlum a. Johan-a, Lalhmangaihzuala, PC Zothankima, Prem Kumar Layak leh Lalduatliana ten wicket khat theuh an la bawk. 

Over 50 an neihah Mizoramin an umphak tur chu hmanhmawh vak lovin an um a, over 40.3-ah mi panga thiin an um phak a. Ramhlun Venglai tlangval, Johan-a’n a tir atanga vuain ball 102 a hmachhawnah run 53 siamin half century a vaw chhuak a, an chakna bulpui a ni phak.

Captain bakah hian Nagaland laka half century lo siam tawh, Vanlalpekhlua Zote-in run 15 (37) siamin Marcus Lalpekhlua’n run 14 (26) a thawh bawk.

Mizoram hian an group match vawi thumnaah Ningani hian Manipur an khel leh dawn a. Khelh hnihah vawi hnih an chak ta a, dinhmun tha takah an ding rih mek.

Inelna kal mekah hian Plate Group-ah Mizoram hi Nagaland, Sikkim leh Manipur bakah Meghalaya leh Arunachal Pradesh nen an awm a. An inkhelh kual hnua a sang pahnihin final khelin champion-in season tharah Elite an kai thei dawn a ni.

INKHEL KHAIKHAWMNA:

Sikkim 134/10 (41 overs)

Sahil Sharma 2/19 (10 overs)

Johan Lalbiakkima 1/21 (10 overs)

Mizoram 135/5 (40.3 overs)

Johan Lalbiakkima - 53 (102)

Vanlalpekhlua Zote - 15 (37)

Wicket ngain Mizoram an chak.