MEN’S U-23 STATE A TROPHY: Khelh hmasak berah Mizoram chak nghal

ZALEN, November 09, 2025: Mizo tlangvalten Men’s U-23 State A Trophy 2025-26 inkhel hmasa berah Sahil Sharma wicket li lak leh Vanlalpekhlua Zote (Tetea) half century vuak chhuah hmangin wicket liin Nagaland an hneh.

Board of Control for Cricket in India (BCCI) hnuaia mipa kum 23 hnuai lam inelna, Plate Group-a an inkhel hmasak berah hian thum vawra chak zawk, Naga tlangvalten vuak hmasak an thlang a, Mizo bowler-te an ngam lo va, over 50 khelh turah over 36.1 chhunga thi vekin run 167 chiah an tlin.

Pathianni khan Mizoram hian tlangvalte an inlan h hnuaia Men's U-23 State A Trophy Plate Group Match chu vawiin ni 9 November, 2025 hian khelh niin Mizoram chuan Nagaland wicket 4-in a hneh.

IS Bindra Cricket Stadium, Mohali, Punjab-a inkhelah hian Mizoram tan Thuampui tlangval, Sharma-a’n mi pali a vawm hlum a, Nasib Rai-a’n wicket thum a la bawk.

Mizoramin hian an umphak tura Nagaland-in an tuk chu muangchanga umin chak loh hlauthawnawm dinhmuna ding miah lovin over 45.4-ah mi paruk thiin an umphak.

Zemabawk tlangval, Tetea’n ball 68 a hmachhawna run 59 a vuak chhuah bakah hian Ramhlun Venglai tlangval, captain leh opener ni bawk, Johan Lalbiakkima’n run 42 (82) a siam bawk a. Anni pahnih bakah a tawp thlenga dam, Bualpui tlangval, Rai (23*) leh Lalduatliana (20*) ten an thawh hlawk hle bawk.

Mizoram hian an group match vawi hnihna hi Thawhlehniah Sikkim nen an khel leh dawn a, anni hian Pathianni vek khan run 93 zetin Meghalaya an lo hneh lo tawh.

Inelna kal mekah hian Mizoram hi Nagalanad leh Sikkim bakah Meghalaya, Arunachal Pradesh leh Manipur nen an awm a. An inkhelh kual hnua a sang pahnihin final khelin champion-in season tharah Elite an kai thei dawn a ni.

INKHEL KHAIKHAWMNA:

Nagaland 157/10 (36.1 overs)

Sahil Sharma 4/10 (6.1 overs)

Nasib Rai 3/35 (10 overs)

Mizoram 160/6 (45.4 overs)

Vanlalpekhlua Zote - 59(68)

Johan Lalbiakkima - 42(82)

Wicket liin Mizoram an chak.

MIZORAM KHELH HMABAK:

November 11, 2025 - Mizoram vs Sikkim

November 13, 2025 - Manipur vs Mizoram

November 15, 2025 - Arunachal Pradesh vs Mizoram