ZALEN, Aug. 25, 2026: Meriam L. Hrangchal-in Supreme Court-a Mizo inneihna leh roluah dan siam thatna (amendment) a khinna chu court sang ber hian Aizawl Bench, Gauhati High Court-ah thlen zawk turin a ti.

Chief Justice Surya Kant, Justice Joymalya Bagchi leh Justice V. Mohana thutna bench chuan petitioner aiawhtu counsel hnenah a client chu Delhi-ah kal buai kher ngai loin a chenna ngeiah high court a awm a, chutah chuan kal hmasa turin a ti a ni.

Mizoram assembly inthlana Congress party aiawha lo ding tawh, Meriam-i hian The Mizo Marriage & Inheritance of Property (Amendment) Act, 2026 siam thatna hi 'India Danpui kalh' tiin Supreme Court-ah hian a khing a. Dan thar hian Mizo hmeichhe, Mizo ni lo mipa neite chu dik lo takin a thliar hrang a, an fate dikna leh chanvo pawh a laksak nia sawiin thiah leh a dil a ni.

Dan thar hian kum 2014-a siam, Mizo Hnam Dan, Mizo Marriage & Inheritance of Property Act chu a thuam chak a, kawppui pakhat aia tam neih phal lohna te, Mizo leh Mizo ni lo inneihna (inter-community marriage) leh hmeichheten an thil neihte (property right) chungchangah thil thar leh danglamna te a siam a ni.

Dan siam that thar hi Lalsangliani Colney pawhin May 8 khan Supreme Court-ah khinna hi a lo thehluh tawh a, siam that tur neuh neuh (defect) a awm avangin ngaihtuah tura chhawp chhuah a la ni lo tih kan thulakna, www.jclalnunsanga.in chuan a tar lang.