ZALEN October 19, 2023: MZP chuan, Mizo Hnam humhim zel a nih theih nan leh hnamdang pasal nei Candidate duh loh lantir nan naktuk ni 20 October, 2023 (zirtawpni) hian "Hnam humhimna kawngzawh" buatsaih a tum a ni.

MZP chuan November ni 7, 2023-a Mizoram MLA General Election lo awm turah Hnamdang pasal nei Candidate a dah lo turin Party tinte a ngen a. MZP ngenna ngaipawimawh a, Hnamdang pasal nei candidate a dahlo party te chungah MZP chuan lawmthu an a ni.

MZP chuan ni 19th December, 2022 khan Party tinte hnamdang pasal nei candidate a dahlo turin ngenna a siam a, ni 21 August, 2023 khan Party tinte ngenna a thawn nawn leh vek a. Party hotute pawh hmuh an ni bawk.

MZP ngenna zah zo loin, Indian National Congress (INC) chuan Lunglei South Assembly Constituency-ah hnamdang pasal nei Meriam L. Hrangchal chu candidate turin an dah a, a ni hi Dipen Zoliana nupui niin, Dipen Zoliana pa chu Niraj Singh a ni a. A nu chu Kawlhmingliani Gorkhali a ni.

Mizo hnam dan "The Mizo Customary Law" Published by Law & Judicial Department Govt. of Mizoram bung 3:74-na chuan, "...Mizo hmeichhiain hnam dang pasal a neih chuan hnam dang chhungkuaah a luta ngaih a ni" a ti a. MZP chuan Mizo hmeichhia hnam dang neite chu hnam dang chhungkuaah a ngai nghet tlat a. Mizo mipui aiawha ram rorelna sang bera thu turin a pawm thei lo a. Mizo nihna hi Mizorama awm rei tawh avanga in pek chiah MZP chuan a ngai lo a, Mizo hnam hi thisenah zawk a ni.

MZP chuan, Mizo hnam damna turin hetianga hnamdang pasal nei in candidate hi hnawl a, vote lo turin mipuite a ngen takzet a. Candidate a dahtu Congress party pawh MZP chuan a dem bawk.