Mi hausa te hausak dan chhui thinmagazine lar Forbes tarlan danin hlawh tam lamah Cristiano Ronaldo chuan Lionel Messi khumin khawvel footballer hlawh tam ber a ni mek. Kumin season chhung hian Cristiano Ronaldo hian Manchester United-ah tax pek hmain $125m (£91.63m) vel a hlawh thei tura rin a ni a, Lionel Messi thung hian Paris Saint-Germain lamah hian tax pek hmain $110m (£80.63m) bawr a hlawh dawn niin an sawi. 

Forbes tarlan danin, Manchester United lama Ronaldo let leh hian $125m (£91.63m) bawr chu  tun season chhung hian a hlawh dawn a, Old Trafford-ah hian $70m (£51.31m) chu a hlawh leh bonus atangin a la ang. Kum 36 mi hi commercial deal atangin $55m (£40.31m) la lut thei tura chhut a ni a, athletes zingah sponsorship atangin a ni aia sum la lut tam thei mi pathum an awm tawh a, chung mite chu Roger Federer ($90m), LeBron James ($65m) leh Tiger Woods ($60m) te an ni.

Nikum lama pakhatna dinhmun luahtu Messi chu Paris Saint-Germain lama a luh hnuah tla hniam hretin pahnihnaah a la awm thung a. Forbes chuan Barcelona star hlui hi tun season chhungin $110m  lalut thei turah a ngai a, a hlawh leh bonus atangin $75m vel an beisei pui bawk. 

Messi-a'n club khata a khelhpui Neymar Jr. leh Kylian Mbappe te chu pathumna leh pali naah an awm thung a, Neymar hian tun season chhung hian $95m a hlawh dawn a, Brazil captain dawta awm Mbappe hian $43m bawr a hlawh tur anga chhut a ni bawk. 

Hlawh sang player 10 zingah Premier League atangin mi pathum an lang phak a, Liverpool star Mohamed Salah chuan list-ah hian pangana dinhmun a luah. Salah hian $41m vel a hlawh rin a ni a, Bayern Munich star Robert Lewandowski chu parukna-ah awmin $35m la lut tura beisei a ni bawk. Mak tak maiin Barcelona midfielder hlui Andres Iniesta, Japanese club Vissel Kobe tana khel mek chu pasarihnaah awmin a hlawh leh bonus atangin $35m zet a lalut tura ngaih a ni. 

Pariatnaah Man United midfielder Paul Pogba awmin $34m a hlawh tura rin a ni a, Real Madrid lama kirleh Gareth Bale hi British player zinga hlawh tam ber niin pakuanaah a awm a, Bale hi $32m rut tura ngaih a ni.

Top 10 zinga a hniam ber chu Real Madrid player thin Chelsea winger hlui Eden Hazard niin tun season-ah hian $29m (£21.26m) vel lalut tura rin a ni.