FIFA World Cup-a an champion hnuah Lionel Messi chuan record a siam zui a, Instagram-a post pakhat like-tu ngah ber a ni. Messi hian amah bakah a thiante nena World Cup trophy an chawi lai thlalak chu IG-ah hian a post a, mi maktaduai 70 chuang zetin an like tawh a ni. 

Instagram-a post like ngah ber record ding lai chu artui a ni kha a ni a, world_record_egg account hmangin post hi siam a ni a, mi maktaduai 58 chuangin an like. Artui bak hi post an siam zui lo thung a, follower maktaduai 4.9 ai an ei thung. Artui post hi hun rei tak chhung chu khum thei an awm lo a, Messi-a'n Wolrd Cup trophy nen a rawn khum ta chauh a ni. 

Kum 35 mi Argentine professional footballer Messi hian IG-ah hian World Cup trophy an chawi lai thlalak 10 lai chu a post a, hei hi mi maktaduai 71.7 in an like a, mi maktaduai khat chuangin an comment bawk. Heng bakah hian Word Cup trophy a lakpuina thlalak eng emaw zat chu a post leh bawk a, a post hi mi maktaduai 50 deuh thaw ten an like a ni. Trophy a mutpui lai thlalak phei chu mi maktaduai 50 chuangin an like tawh. 

Footballer piang tawh zinga ropui ber ang hiala mi tam takin an chhal Messi hian IG-ah hian follower maktaduai 407 a nei a, post 974 a siam tawh. World Cup nomawi a chawi hnu hian follower a neih belh hnem hle a, hei hian lawmpuitu a ngah zia a tilang chiang mai awm e.