A khelhna club-in chawlhkar hnih chhung an hrem hnuah Lionel Messi chuan Paris Saint-Germain-a a khelhpuite hnenah training-a a inlan loh avangin social media-a video a dah hmangin ngaihdam a dil.

PSG hi Pathianni khan an khelmual ngeiah Lorient chuan 3-1 in an hneh a, an inkhelh tuka an tih dan thina first-team squad-ten  training an awl thin pawh an thulh phah.

Messi-a hi kar tira an training-ah hian a inlan ve ta lo va, a hmaa ruahmanna a lo siam lawk tawh angin Saudi Arabia rama tourist board nen contract neih chungchanga indawr turin a lo zin daih a. He a zin hi a hmaa a tum tawh niin tun season-ah vawi hnih lai a lo thulh tawh zawk a ni.

Les Parisiens chuan an phalna la hmasa lova a zin avangin an thinrim hle a, Messi chu chawlhkar hnih chhung an hrem thu puang zuiin Ligue 1 nomawi inchuhnaa Marseille-in an um mek laiin vawi hnih a inkhel thei dawn lo.

Hetiang boruakah hian Messi chuan social media-ah ngaihdam dilna a tichhuak ta a, a Instagram story-ah a dah chhuak.

“Ka lo tih dan pangngai angin kan inkhelh tukah kan awl turah ka lo inngai a. Zin chhuak turin ruahmanna ka siam a, thulh theih a ni tawh si lo. A hma pawhin he ka zin tur hi ka lo thulh tawh a ni,” tiin court ha chungin, a aw-ah pawh ti tak tih hriat takin video-ah hian Messi hian a sawi.

“Ka khelhpuite hnenah ngaihdam ka dil a, club-in ka chunga tih an duh ang apiang chu ka nghak a ni,” a ti bawk.

PSG hian tun lai hian boruak neuh neuh an nei nasa hle a, an phalna la lova Messi-a zin hnu leh an hrem hnuah fan-te chuan club neitute laka an lungawi lohna tilangin Paris kawtthlerah an inhawr khawm a. An forward Neymar Jr in kawtah pawh pungkhawmin chhuak turin an au el.

Nipuia a contract neih lai hmang zo tawh tur, Messi-a pawh hrem a nih thu puan a nih hnu lawkah contract ziah belh lovin a chhuak dawn tih puan chian zui a ni.

Kum 35 mi, Argentina captain leh World Cup lakpuitu hi a inzir chhuahna, Barcelona-ah kir leh tur anga sawi a zui nghal mek a. Saudi Arabia-a Al Hilal-in sum tam tak nen an thlem tih leh Major League Soccer lamah Inter Miami pawhin an sawm tih a awm bawk.

La Blaugrana chu a hnaih ber a ni meka sawi a ni a, a pa, a agent ni bawk, Jorge leh Catalan club president pawh indawr tawh angin an sawi a; mahse, Barca hi sum lamah an pachhiat rih avangin an fapa ko kir leh tur chuan kawng hrang hranga an insiam rem a ngai dawn niin an sawi.