Lionel Messi chu an thu hmu hmasa lova a zin chhuah avanga Paris St-Germain-in chawlhkar hnih chhung an hrem thu an puan hnu lawkah, nipuia contract a neih lai tawp tur pawh ziah belh lovin a chhuak dawn tih puan zui a ni leh ta.

Argentina captain nia World Cup nomawi latu hi a hma chuan ‘a thuphungin’ kum khat dang Paris-a awm zui turin inremna siampui tawh a ni a; mahse, hei hi tihlawhtling tak tak turin club emaw, player emaw chuan inremna an siam dawn ta lo.

Messi hian khawmualpui huap inelna sanga ropui nih a duh a, chumi atan chuan sum sen pawh a duh a; mahse, French champion hian sum lamah buaina tawk vein player man to lei leh ai chuan kum naupangte chher an tum tawh zawk.

Kum 2021 khan Paris club-a awm tur hian kum hnih daih inremna a ziak a, kum khat dang ziah belh theihin thu an dah bawk a; mahse, a ziah belh dawn ta lo a ni.

A pa, Jorge Messi chuan a fapa a chhuah tur thu hi Paris St-Germain football advisor Luis Campos hnenah chawlhkar tam vak lo liam taah khan a lo hrilh tawh nia sawi a ni.

Messi-a hian Financial Fair Play rules avangin season thara PSG budget hi rik pawp pawp theihna tur chi a ni lo niin a ngai a, hei hian an squad chhah dan tur pawh a nghawng thei ang.

PSG neitu, Qatari mi hausate chuan Messi-a hi kawl zui chu an duh ngei a; mahse, tun hnaia vawi eng emaw zat sawipui an tum chu a chhang tha tha lem lo thin a, hei hian awm zui zel a duh lo tih a tichiang ve bawkah an ngai.

Kum 35 mi hi Thawhlehni khan PSG chuan an phalna nei hmasa lova Saudi Arabia a zin avangin chawlhkar hnih chhung an hrem tur thu an lo puang tawh.

Footballer dam lai zinga thiam ber mi tam takin an ngaih, Messi-a hi a chhuak dawn a nih chuan khawiah nge a kal ang tih chu zawhna awm nghal a ni a. A inzir chhuahna, Barcelona nen sawi zawm an lo ni twh a, Catalan club pawhin Nou Camp-a lak luh leh an duh niin a lang a; mahse, La Liga hmahruaitu hi sum lama buai ve tho an ni a, hei vang hian koh haw leh chu an tan a awlsam bik a rinawm loh.

Major League Soccer lamah Inter Miami pawhin Argentina captain hi an duh tih sawi a awm reng a, Saudi Arabia atang pawhin kum khata Euro maktaduai 400 zet hlawh tura sawm pawh an awm nia sawi a ni.

MLS leh Saudi Arabia lam pan ai chuan Messi-a hian football hmunpui, Europe-ah ngei season khat tal chu daih khawp theihna a la nei niin a inngai a, a vawi nga nana Champions League nomawi lak leh a la duh a. Hetiang ti tur hian Barcelona chu a tan kawng hnai ber a ni a; mahse, sum bawk buaina a ni.

Messi-a hian PSG tana a khelh tawh chinah vawi 71 inlanin goal 31 a thun a, a thiante thun tur vawi 34 a siamsak bawk a, season liam ta khan Ligue 1 nomawi a lakpui bawk.

Hremna a tawh mek avangin Troyes leh Ajaccio a hmachhawn ve thei dawn lo va, tunah hian khelh nga an la neihah point ngaa sang falin season 11 chhunga a vawi kua nana champion turin an inchhawp hnai mek.

La Masia atanga inzir chhuak, Messi-a hi Barcelona tana goal thun tam ber niin vawi 778 a khelhah goal 672 zet a thun tawh a, sum awm loh vang thovin Nou Camp a chhuahsan a, lak luh leh an tum pawh sum vang bawkin a buaithlak dawn em tih chu hunin a la hril ang chu.

December thlaah khan World Cup-ah an champion a, a vawi riat nan October thlaa Ballon d’Or dawng leh tura rinkai a ni a, a dawng leh a nih chuan amah hnaih bertu aiin vawi thumin a dawng tam dawn a ni.