Javier Zanetti chuan kumin November ni 29 a semchhuah tur Ballon d'Or chu Lionel Messi-a'n a dawn ngei a rin thu a sawi. Argentine legend chuan PSG star hi 'mi dangte aiin a danglam bik' tia sawiin chawimawina ngaihhlut chu a phu thu a sawi.

Lionel Messi hi Ballon d'Or nominee 30 zingah a hming a lang a, tunah hian Chelsea player Jorginho leh Bayern Munich superstar Robert Lewandowski te nen huang khatah awm mekin Liverpool lam atangin Mohamed Salah leh Real Madrid star Kaim Benzema te pawh dawng thei zinga hming langsar an ni mek. 

Olé nen an inbiaknaah Zanetti chuan Messi-a'n kumin Ballon d'Or dawn a phu thu hi a sawi a, Argentine team ten 2021 Copa America an chawi theihna tura Messi-a thawh hlawk dan enin, award hi a phu thu Argentine defender hlui hian uar takin a sawi a ni. 

"Ka ngaihdan chuan Messi hian Ballon d'Or hi a dawn ngei ka ring, achhan chu tun thlengin player danglam bik a nih zia kan la hmu a ni. Football a khelh tir atangin tun thlengin a number hak te hian mi ala khawih a, Europe-ah a ni emaw Argentine National Team tan pawh khel se danglamna ala nei lo," a ti. Sawi zawmin Zanetti chuan,"Kum rei tak hnuah captain leh hruaitu nih laiin Copa América a chawi a, a ram pumpui lawmna a thlen a ni. Hengte avang hian ka ngaihdan chuan kumin Ballon d'Or hi chu Lionel Messi-a lak awm tak a ni," a ti. 

Patrice Evra erawh chuan ngaihdan dang neiin Lionel Messi ai chuan 2020-21 Champions League chawitu Chelsea player Jorginho emaw N'Golo Kante hian kumin Ballon d'Or chu an phu zawk thu a sawi chhuak ve thung. "Ka ngaihdanah chuan Ballon d'Or hi N'Golo Kante emaw Jorginho te hian an phu hlein ka hria a, mi tam takin midfielder mai a ni an tih te hi hriatthiam harsa ka ti hle a ni," a ti. "Jorginho-a'n a dawng lo a nih chuan rorelna dik tawk lo ang hialah kei ka ngai ang," tiin Evra chuan a ngaihdan a sawi chhuak ve thung a, Messi-a'n a dawngang tih a hlau hle bawk.