Barcelona-a ‘Lionel Messi ko haw leh’ tura campaign boruak chuan chanchinbu leh fan zingah thawm a nei lian zel a, manager Xavi thleng pawhin thawm an nei tawh.

Hetih mek lai hian Paris khawpui atanga an fapa koh haw leh hi Catalan club tan hlen chhuah theih a ni dawn em tih zawhna a awm a, harsatna lian ber mai chu sum a ni.

Messi-a hian Paris Saint-German-ah tun nipui thleng bak hun a nei tawh rih lo va, France-a khawsak zui zel tumna a neih thu a la ri rih lo.

Barcelona-a kir leh a duh anga sawi a awm tawh a; mahse, goal 672 zet a lo thunsak tawh club hian leiba an ngah a, referee thamna thawm nen, an hming lar dan a fuh lo viau rih a. Hlawh ringawtah pawh season khatah Euro maktaduai 600 chuang an inseng mek a, hei hi Euro maktaduai 200 vel tala tihhniam an mamawh hmasa.

Barca tan hei hi thil awlsam a ni lo va, tunah hian Nou Camp cheihnum an ngaih avangin Olympic Stadium hlui, Montjuic-ah November, 2024 thleng bu an khuar rih a ngai dawn a. Heti a nih chuan an sum hnar pakhat, ticket an hralhna atanga an hmuh thin zinga Euro maktaduai 55 vel an hloh dawn tihna a ni.

Hetih mek lai hian khawvel football fan-te star rawn, Messi-a hi an ko haw leh a nih chuan investor leh sponsor an hip leh sawt dawn a, chu chu sum hnar a ni ve dawn bawk.

Hei bakah hian ‘Negreira scandal’ tia an sawi, Spain-a referees’ committee-a vice president ni thin, Jose Maria Enriquez Negreira-a an lo tham nia puhna avanga an hmingchhiatna pawh Messi a hming avangin tam tak an khuh thei bawk.

Barca hotute lu pawh a hai a, a bikin kum hnih liam taa hralhtu, president Joan Laporta phei chuan thutlukna siam harsa a ti a. President hi Messi pa, a agent ni bawk, Jorge nen pawh an inkawm tawh a, Messi nen tak erawh hmaichhanah an la inkawm lo thung.

Barca hian kum hnih daih tal contract ziahpui an duh nia sawi a awm a, Nou Camp-a an kum 125-na an lawm laia an hnena khel ngei turin an duh nia sawi a ni.

Spanish chanchinbu, Sport chuan season khatah Euro maktaduai 25 hlawhtir an phal niin an tar lang a, hei hi a chhuahsan laia a hlawh hmun lia thena hmun khat vel chauh a ni tawh thung.

Harsatna awm thei tam tak karah hian kum 18 chuang a khua anga a lo chhal tawh, Barcelona khawpui hi Messi-a pawh hian ‘a ngainain a ngai’ tih loh theih loh a ni a. A fate pawhin Catalonia khawpuiah sikul an la kai nia sawi a ni.

Hei mai bakah hian Barcelona-a a lo khelhpui thin, Jordi Alba leh Sergio Busquets te nen, an nupuite theuh hruaia zanriah an eiho pawh hmuh a lo ni fo tawh bawk.

Barcelona hian ‘kawng an dap a nih phawt chuan an hmu dawn a, an la kir thei’ tih chu khawthlang chanchinbute ngaihdan a ni mek.