Paris Saint-Germain (PSG) forward Neymar chuan footballer ropui pahnih Lionel Messi leh Cristiano Ronaldo te chungchang-ah tunge ropui zawk tia an zawhna chu thu mal khat lek "Genius" (pianpui finna sang leh chungchuang bik nei) an ni tiin a chhang daih. 

Heng legendary forward pahnih ropui tak a an career hmang mek te chungchang a sawi dan hi tawi hle mah se a fun kim khawp awm e.  Tunge ropui zawk a ropui lo zawk a hriat theih miah lo bawk. Messi hian Ballon d'Or tum 7 a dawng tawh a, Ronaldo thung hian tum 5 a dawng tawh thung. 

Portuguese forward hian club inelna ngaihhlut ber Champions League trophy tum 5 a chawi tawh a, Argentine hian tum 4 a chawi tawh thung. Khawvel player tha ber pahnih hi kawng hrang hranga khaikhin thin an ni a, tunge ropui zawk tih chungchangah hian fans lam pawh an inhnial nasa thin reng a ni. Mahse, an thiamna leh theihna te, an records te atang ringawt hi chuan tunge ropui zawk tih hi thlan chhuah mai theih a ni lo thung. 

Fing tak maiin Neymar hi chuan an pahnih-a ropui zawk a sawi hran lo va, mi chungchuang bik an nih thu mai a sawi. Hei hi Messi-a duh dan pawh a ni awm e. 

Neymar leh Messi hi PSG lama an khelh dun leh hma hian hun eng emaw che Barcelona lamah an khel dun a, Luis Suarez a nen an pathumin 'MSN' trio tiin hlawhtlinna thahnem tak an seng tawh a ni. Anni pahnih hian Champions League trophy pakhat leh La Liga title pahnih an chawi dun tawh bawk. 

Barca lama a awm chhung khan Neymar hian goal 105 thunin assist 76 a nei hman. Messi thung hi  Nou Camp lamah chuan greatest of all time tih a ni deuh tawp. Argentinian hian season 16 a cham chhungin game 778 khel hmanin goal 672 a thun bakah assist 303 zet a nei bawk. 

Tunah PSG lamah awm dun lehin season liam ta khan Ligue 1 an chawi dun leh tawh a, tun season hian Ligue 1 bakah UCL chawi ngei an tum dan a ni. 

Season kal mekah Brazilian hian inkhelh vawi 6-ah goal 9 leh assist 7 a nei tawh a, Argentine hian goal 4 leh assist 6 a nei tawh thung.  Neymar chuan fans ho hnenah Ronaldo hi ka khelhpui chak a ni, player ropui pahnih Messi leh Kylian Mbappe te chu ka khelhpui tawh a, Cristiano Ronaldo hi ka la khelhpui ve lo a ni,” a ti.