Barcelona manager Xavi chuan, "Lionel Messi hi Barcelona lamah a rawn let duh a nih phawt chuan a tan club-in kawng kan hawng reng," a ti. 

Messi-a'n a seilenna club Barcelona a chhuahsan dawn khan a rilru a nain hrehawm ati hle tih a hriat. A contract a zo a, Barcelona lamin a beisei zat sum an thehchhuh theih bawk si loh vangin mittui nen a chawr chhuahna, a ngainat leh a hming chherna club chu hreh takin a chhuahsan a nih kha. 

Bercelona lama khelh zui a rem loh hnuah kum 34-a upa Messi chuan club hausa leh UEFA Champions League trophy chawi chaka tui hal PSG a zawm ta a.  Mahse, Argentinian hian Paris lamah beisei a phak rih tlat lo. Barca lamah goal a thun theih tehreng nen PSG lamah goal a khung hlei thei lo va. Paris lama a kal hnuin goal sarih chiah a la khung vangin French media leh fans ten an sawiselin an diriam mek reng a ni. 

Hetihlai hian Barcelona lama Messi khelhpui thin Xavi chuan nikum November thla atang khan Blaugrana enkawlin hmasawnna a thlen nasa hle a, Xavi hian a hnuaia khel turin Messi hi rawn let leh turin a duh hle bawk a ni. 

Balon d'Or tum sarih dawng tawh Messi leh Xavi hi thawk dun turin Barcelona fans lam chuan an duh hle bawk a. Engtik niah emaw chuan a la let leh nge nge mai thei.
Xavi chuan, "Messi hi kan club history mai bakah khawvel pum huap pawha footballer tha ber a ni a. Coach ka nih angin a rawn let duh phawt chuan atan hian zau takin kawng ka hawng reng a. Aman a duh phawt a nih chuan engtik lai pawhin a rawn let thei a ni," a ti.