Barcelona lama Lionel Messi a awm lai kha chuan a ropui ve em a, tu tluk phak rual a ni lo tih kan hre vek awm e. Khatiang khawpa  hmingthang leh thiam a nih vang a team-mate a position-a tlan ve thenkhat chuan an tuar hle a, chung  amah vanga an lar tur anga lar chhuak phak ta lo te chu kan hre kher awm lo ve. Argentina captain hi amah mimal thiam vang piah lamah a vanglai leh Catalan vanglai a in ngang fuh hle a, Camp Nou-ah khan trophy 35 zet a chawi hman a, game 778 a khelhah goal 672 thunin assist 303 a nei hman a ni. 
   

Trophy an lak tam leh amah  imal a hiam piah lamah team-mate a nei tha em em a, Neymar leh Luis Suarez te nen an han inkawp ngat phei kha chu tun thlengin kan la sawi zui a nih hi. Anni bakah player langsar Samuel Eto'o, Pedro leh David Villa te pawh a khelh pui hman a, heng zingah hian a dip nat em vanga club chhuahsan ta leh an thiam phu a lar chhuak lo an awm a ni. 
   

A khelhpui dang player langsar tak tak thahnem tak an la awm a, mahse heng player te hi Messi vangin an thiamna tak tak a lan chhuah loh phah zawk mah em aw tih turin a awp hlum hneh a ni. Chung player 5 te chu:

#5 Zlatan Ibrahimovic
Sweden pa lian hian Inter Milan a chhuahsan hnuin 2009 khan Barcelona a zawm a, mahse vanduaithlak takin Messi-a tlan duhna ber centre-forward a tlan thin a nih vangin Messi a luahlan zo lo. Kum 40 mi hian a biography-ah tiang hian a ziak hial a,"Barcelona tana khelh kha ka naupan lai atanga ka mitthla thin a tak rama cheng ang hialah ka in ngai. Mahse, a chhungah erawh hun nuam tak ka hmang lem lo. Messi-a'n thu a sawi ve tawh chuan ruahmanna dang a leng ve tawh lo. Mual sir lama khel duh lovin a laiah ka tlan duh a tih tawh chuan, coach-in 4-3-3 hman duh mahse formation thlak danglam a ngai a, a duh dan angin 4-5-1 a thlak a ni nghal mai thin. Mual chhunga hlawhtling turin zalenna ka nei lo va, hlawhtlin ngaihna a awm lo," tiin a vui nasa hle.
   

Zlatan Ibrahimovic hi kum khat chiah Barca-ah hian awm hmanin game 46 khelhah goal 22 thunin assist 13 a nei. A kum lehah loan hmangin AC Milan a zawm a, 2011 khan €24 million-in an lei zui. 

#4 Alexis Sanchez
 Chilean forward Alexis Sanchez hi attacker ropui ni chunga Messi vanga Barcelona lama hlawhtling thei lo langsar a ni bawk. 2011 khan Serie A club Udinese atangin €26 million-in Barcelona a zawm a, attacker ropui hian Messi a bulah a ropuina a lan chhuahtir phak lo a ni ber mai. Sanchez hi Argentine Messi-a hnuaiah hian hun eng nge maw chen awmin a hnuah chuan 2014 khan €42 million lawihin Arsenal lamah an hralh ta a ringawt a. Match 141 a khelhah goal 46 thun hmanin assist 37 a nei bawk. 

#3 Samuel Eto'o
Cameroonian hi a vanglai chuan Barcelona innghahna a ni phak a, goal a thun thei em em a, kum 5 chhung Barca-a a cham chhung khan game 199 khel hmanin goal 130 zet a thun bakah assist 40 a nei thei a ni. 
   

Samuel Eto'o leh Barca manager Pep Guardiola te chuan boruak tha lo an neih cho a, Messi a rawn langsar ve tan bawk nen Cameroonian pawh a tuitla lo chho tial tial. Lionel Messi a laia a rawn tlan ve tak hnu phei chuan Eto'o hian a dinhmun ngai a luah leh tawh lo. A tawpah phei chuan striker ropui hian 2009 khan Inter Milan a zawm ta ringawt a ni. 

#2 Antoine Griezmann
2019-a Antoine Griezmann-a'n Camp Nou a zawm khan Barca thiampuipa Lionel Messi chu Antoine Griezmann-a chu a lo lawm tehchiam lo nia sawi a ni. Frenchman Griezmann hian a lar vanglai tak 2019 nipui laiin Camp Nou a zawm a, Messi pawhin a larna hliah khuh thei turah ngaiin alo huphurh ve deuh pawh a ni mai thei e. Catalan lama a input luh tirh vel boruak hi Griezmann-a documentary 'La Decision' ah sawi lan a ni. 
   

Anni pahnih hi player tha ve ve ni chungin an inkawp rem hleithei lo va. Camp Nou mual chhung leh pawn lamah pawh an ni pahnih hi chu an inchukha teh chiam lo a ni awm e. Luis Suarez leh Neymar te anglo takin Lionel Messi leh Antoine Griezmann te inkawp hian beisei an phak lo. 
   

An pahnih hian a rualin nikum nipui transfer lai khan club an chhuahsan ve ve bawk. Frenchpa hi loan hmangin Atletico lamah a chhuak a, Argentine star pawh PSG lamah free agent-in a chhuak bawk.

#1 Philippe Coutinho
Beiseina sang tak nena an lei chhuah Philippe Coutinho hian an lak luh ni atangin beisei a phak thei lo. Barcelona lama a tui tlak loh nachhan langsar ber chu an thiampuipa Lionel Messi nen an tlanna position a in an vang a ni. A tawpah chuan a ni pawh hi a tlawm leh dingchang lo zawkah a tang leh.
   

Brazilian hian a position duh ber chu a chang ve zauh zauh thin tak nain a chang rei thei lo va, chuvangin Camp Nou lamah hian a ngam sarh hlei thei lo va, 2019 nipui transfer khan Bayern Munich lamah loan hmangin a chhuak ta nge nge. 
   

Season thar a inhre chhuak a, a club hlui lamah bawk chuan a let leh, mahse thil a danglam thei chuang lo, a khelh tha tawk lobawk nen, loan hmang bawkin Aston Villa lamah a kal leh a, a chhuah hnu ni reilo teah Lionel Messi chuan a club a chhuahsan ve leh bawk. Brazilian hian Premier League lamah a carrer siam that tumin a bei ngawrh hle a, game 9-ah goal 4 neiin assist tum thum a nei ve tawh a ni.