February 23, 20234; R. Lalduhawmi, Judge, Special Court (ND&PS Act, 1985), Aizawl chuan Methamphetamine vanga man mi palite chu thiamloh a chantir.

October ni 28, 2022 khan Excise & Narcotics Department chuan Methamphetamine tablet 10,000 (Kg 1 & gram 4) leh he case-a inhnamhnawih nia puh mi pali - Zodingliana aka Zadingluaia (40) S/o Rinthanga, Chaltlang venglai, Aizawl; Samil Ahmed (28) S/o Sahab Uddin, Kalalchouri, Karimganj District, Assam; Vanlalruati (41) D/o Siamliana (L), North Hlimen, Kolasib District leh Zorampari (46) D/o Lianzama (L), Bilkhawthlir Kawn veng te chu an man a. An pali hian The Narcotic Drugs & Psychotropic Substances Act, 1985 tlawhchhanin thubuai siamsak an ni.

He Case hi Judge, Special Court (ND&PS Act, 1985), Aizawl chuan ngaihtuahin thuhretu kovin, finfiahna hrang hrangte a endik hnuah 9 th February 2024 khan The Narcotic Drugs & Psychotropic Substances Act, 1985 tlawhchhanin thiamloh chantirin 13th February 2024 khan thiamloh changte hremna hi a puang.

Zodingliana aka Zadingluaia chu heng ruihhlo hralh tur zuartu ber niin Section 22 of NDPS ACT hmangin kum 10 chhung hrehawm taka lungin tang tur leh pawisa Rs.1,00,000 chawi tura hrem a ni a, heng pawisa chawi tur hi a neih loh chuan thla 4 dang a tan belh ang. 

He case-a thiamloh chantir midang pathum – Samil Ahmed, Vanlalruati leh Zorampari te pawh Section 22 © of NDPS ACT hmangin kum 10 chhung hrehawm taka lungin tang theuh tur leh pawisa Rs. 1,00,000 theuh chawi tura hrem an ni a, heng pawisa chawi tur hi an neih loh chuan thla 2 dang an tan belh ang.

Samil Ahmed, Vanlalruati leh Zorampari te hi ruihtheih thil kaihhnawiha thil tisualtute an tanpui avangin Section 29 of NDPS ACT hmangin thiamloh chantir theuh an ni bawk a, kum 10 chhung hrehawm taka lungin tang theuh tur leh pawisa Rs. 1,00,000 theuh chawi tura hrem an ni bawk a, heng pawisa chawi tur hi an neih loh chuan thla 2 dang an tan belh ang. Amaherawhchu Court-in an chungah zahngaihna lantirin heng hremna chi hnihte hi hun thuhmuna kaltir (concurrently) a ni ang.

He thubuaiah hian Sawrkar aiawhin R. Lalnunpuia Addl PP, Ramdingliani APP leh Zosangpuia APP te an ding a ni.